Olympic an kaltlang pui dawn?

China rama coronavirus leng vangin harsatna hrang hrang a thleng mek a, kumin nipui laia neih tur Tokyo Olympic pawh a hun sawn emaw ṭhulh thut mai theih hlauhthawn awmah a ding hman. Inelna thlengtu lam chuan hri leng karah infiamna khawmpui lian an thlen theih an beisei thu an sawi.

Tokyo 2020 CEO Toshiro Muto chuan, "Mumal taka sawi khawmna pawh a la awm hran lo, thu lengvak erawh a tam hle thung. Ruahmanna leh zir bingna chu kan nei ngei mai, tuna kan ruahman dan chuan Olympic leh Paralympic kan thlen tur hi a hunah kan nei thei ang," a ti.

International Olympic Committee (IOC) chuan Covid-19 hi an ngaihven thu leh infiammite himna an duh thu an lo sawi tawh a, hei vang hian Olympic neih hun sawn tumna erawh a awm tihna a ni chuang lo - Japan ramah hri vei awm mah se a darh zel veng turin sorkar thuneitu lam an thawkrim hle.

Japan prime minister Shinzo Abe chuan, "Keini lam chuan he infiamna khawmpui lian thlen hrehna leh ṭhulh duhna kan nei hran lo, kan thil tawn leh harsatna awm theite erawh IOC lamah kan thlen zel thung ang, tluang taka neih theih ngei a nih kan beisei," a ti.

Ruahman dan chuan Japan khawpui Tokyo hian July 24 aṭanga ṭan turin Summer Olympic a thleng dawn a, August 25 aṭangin Paralympic pawh neih chhunzawm a ni ang.

Hri leng vang hian infiamna hrang hrang chu ṭhulh leh a hun sawn a awm nual tawh. Tun hnai khan IOC senior member Dick Pound chuan, "Thil thleng hi kan thunun theih bak a nih tawh chuan a hun sawn aiin ṭhulh mai theih a ni," tiin a lo sawi tawh.

Japan ramah khua a lum ṭhin a, Europe leh United States lama infiammite tan a lum zual tura ngaih a ni. Inelna thlengtu lam chuan infiammiten ṭha taka inelna an hmachhawn theih nan kawng hrang hrangin hma a la, an hmalakna zingah stadium chhunga vur lem surtir pawh nikum kum tawp lam khan an lo enchhin tawh a ni.