Ramhlun hnehtu Vikings hmabak Chawnpui

Mizoram Super League season 6 khelh laiah Chanmari Vikings chuan hnehna an chang ta. Team thar pahnih inkhelah Vikings hian Ramhlun Sporting Club chu 76-61 in an hneh, zanin dar 6:30 hian Chawnpui Basketball Club nen an inhmachhawn chhunzawm leh ang.

Chawnpui hian an match hmasa lamah Tuikual South leh Khatla TBL an ngam lo, semifinal khelh an duh a nih chuan zaninah chak a pawimawh tawh ang; an chak lo a nih chuan a sang pali zinga tel beisei ngam a har ang - Vikings erawh an chak nawn a nih chuan an dinhmun a ṭha dawn.

MSL-ah player hmuhnawm bik an awm tawh ṭhin a, season kal laia hmuhnawm berte zinga mi chu Raymond Miller Jr. a ni. Chanmari Vikings forward hian Khatla TBL lakah point 28 a neih hnuah Ramhlun hmaah a hrang zui.

American player hian RSC a ngam hle, point 33 a neih bakah rebound vawi 27 zet a la. Rebound a lak zinga pariat hi an khingpuite basket lamah a ni a, hnehna an chan theih nana tha thawh hlawk ber a ni chiang hle.

Vikings coach H. Lalhruaitluanga chuan, "Kan beisei angin a khel thei a, zaninah pawh ṭha taka a khelh leh theih kan beisei. Basketball hmuhnawm chhawpchhuah leh kan tum," tiin Vanglaini a hrilh. Ahruaia hian semifinal lut tur chuan an tan Chawnpui hneh a pawimawh thu a sawi bawk.

Chawnpui BC-in Harry Koop Singh an neih belh tawh a, American player hi eng ang taka ṭha nge a nih hriat la ni lo mah se tualchhung player a neih sa ti phur tur khawp chu a ni - beisei nei chau tak Chawnpui beiseina siamsak turin a tling tawk em tih chu zaninah a hriat ang.

Chawnpui manager Laltlawm-lova chuan, "Tualchhung player ka khaikhin chuan Vikings aiin kan fit zawkah ka ngai, kan tan inkhel pawimawh a ni a, hnehna chan ngei kan tum ang. Harry pawh hliam tenau a neih a dam tawh a, a hmel a inlan thei dawn," a ti.

Match hmasa lama khel hmuhnawm tak Laltlanhlua, Andre Lalhruaitluanga, K. Lalremsanga leh Jackson Lalrintluanga te an pawimawh leh dawn, anni hian Harry an thlawp fuh a nih chuan Vikings hneh turin theihna an nei sang ve tawk.

Zanin Inkhel Tur

A hmun : Hawla Indoor Stadium

Chanmari Vikings 06:30 PM Chawnpui BC

Inkhel Thlirna Tawi

QTR    1    2    3    4    Tot

RSC    16    16    13    16    61

VKS    21    17    23    18    79

Team Dinhmun

#    Team    Pld    W    D    L    PD    Pts

1    Zarkawt BCA    2    2    0    0    35    4

2    Khatla TBL    2    2    0    0    19    4

3    Chanmari Vikings    2    1    0    1    5    3

4    Tuikual South    2    1    0    1    -1    3

5    Chawnpui SC    2    0    0    2    -7    2

6    Ramhlun SC    2    0    0    2    -51    2