Tualchhung basketball roreltu Zarkawt BCA

Mizoram Super League season 6 champion chu Zarkawt BCA an ni. Ningani zan final game 2 inkhelah BCA hian 81-67 in Khatla TBL an hneh a, game 1-ah hnehna an lo chan tawh bawk avangin best of three series chu 2-0 in an la.

Tualchhung basketball inelna lian leh sang berah Zarkawt club hi tun hnaiah a zawnin vawi thum an champion ta, record nei ṭha ber an ni. Vawi hnih champion tawh TBL chungah an awm, Mission Veng Vikings an champion ve tawh bawk.

Hawla Indoor Stadium, Republic Vengthlanga inkhel pawimawhah Khatla TBL tan chetsual a thiang tawh lo a, hamrik hmasa ber a rik hnu lawkah Lalhmachhuana chuan 3-points rawn nei nghal nawlhin a team beiseina a siamsak.

Mahse, Khatla team lawm chhung a rei lo. BCA lamin quarter hmasa berah 21-12 in hma an hruai hman a, chawlhlawk an hman meuh chuan Zarkawt club hi point 19 zetin an sang fal hman, champion tur a chiang tawhah a ngaih theih.

Team ṭha leh tawnhriat nei hnem awmna TBL an tlawm duh bik lo. Quarter thumnaah huaisen takin an bei let - Vikings champion pui tawhtu Moses Zoremmawia leh Sowkin Shetty te chu free throw an channa lamah an inbakkaih a, inkhel zui thei lo tura hnawhchhuah an ni.

Buaina a inhnamhnawih Eddie Zaithanmawia pawh hnawh chhuah a ni bawk. TBL lamin an inthlauhna an sawr zim hret a, point 10 vel chauhin an inthlau hman. Mahse TBL vanduai a kaltluang laklawh, an player zinga khel ṭha ber Hmachhuana chu kerek hliam vanga lak chhuah niin, an beiseina a thamral.

'Player chah chhuak fuh ber an champion ang' tih ang ngawt kha a ni ta lo. Zarkawt BCA hian state pawn player chu nei mah se an innghahna chu tualchhung player an ni a, an champion chhan pawh a ni chiang viau.

Lalrina Renthlei-in hla deuh tâk aṭanga 3-points a vawm lut nalh nalh te, Zonunsanga siamsak Shety-a'n chiang tâka a dunk te, leh TBL basket neih tur Matthew Remtluanga Sailo-in a lo dan (block) hmiah hmiah te chu hmuhnawm a tling.

BCA player an in man ṭha a, a bik takin guard Lalrina leh Zonuna te chevel a hmuhnawm, forward Rinmuanpuia Chhangte sawi hmaih a thiang lo. Lunglei tlangval hian hun pawimawh laiah point a nei nalh nalh thei, game 2 bika point 14 neitu hi season thar atan lo chhinchhiah rawh u.

Zarkawt team hian league round-ah an khingpui an hneh vek a, semifinal leh final-ah pawh harsatna an tawk lo. Tun dinhmunah chuan tualchhung basketball team ṭha leh hmuhnawm ber an ni tih chu a chiang, an tawpna tur a la ni lo ang.

Khatla TBL coach Lalrinzuala chuan, "Basket kan nei thei lo lutuk kha a mak hle, kan vanduai zan a ni. Chutih rualin buaina chhuakah player inhnamhnawih an awm nual kara kan player pahnih hnawhchhuah a ni kha a pawi," tiin Vanglaini a hrilh.

Rina chuan sawi zawmin, "Tun ṭumah chak lo mah ila kan tawpna tur a ni lo. Kan squad-ah hian player tawnhriat nei ṭha leh rawlthar an inchawlhpawlh ṭha a, tournament lo awm leh turah chuan team ṭha zawk nen kan inlan ang," a ti.

MSL season hmasa pahnihah TBL hi chiang takin an champion, tun hnaiah erawh an tlahniam. An thiampuipa H. Laldinsanga la inkhel mah se a vanglai a pel tawh, final bikah an player pawimawh Zorinsanga an chhawr thei lo an tuar tih a lang bawk.

TBL hian theihna an nei, thlen pawh an thleng sang. Mahse season li chhung chu a ṭha ber an ni thei ta lo. Tun hma lama an ropuina ang kha neih let leh ngei an tum dawn a, tualchhung club lian dang nen inelna hmuhnawm leh ngaihnawm zawk an chhawp chhuak leh ngei ang.