Lalrina Renthlei a hlu ber

Mizoram Super League season 6 Most Valuable Player chu Lalrina Renthlei a ni, Tuikhuahtlang star hian MVP chawimawina hi a zawnin season thum a dawng tawh a, ani aia dawng hnem an awm lo.

Lalrina hian Mission Veng Vikings chu MSL3 champion a nih pui tawh bawk, a hnuah Zarkawt BCA panin hlawhtlinna a chang chhunzawm zel. Season tharah pawh MSL khelh chhunzawm a tum a, a club khelhna tur erawh sawi theih a la ni lo thung.

Vanglaini zawhna chhangin Lalrina Renthlei chuan, "Contract hi kum khat atan bak ka ziak ngai lo a, tunah hian season tharah eng club nge ka zawm dawn tih a la chiang lo. Inelna neih lai kha chuan contract chungchang ka ngaihtuah duh lo, tunah chuan muangchangin kan ngaihtuah ang.

"Nupui fanau ka neih tawh avangin tun hma ai chuan hun puma basketball buaipui a har deuh, amaherawhchu tualchhung basketball inelna lian hi khelh leh ngei chu ka la tum," a ti. MSL7-ah pawh a hmel kan hmu leh ngei dawn.