ISL: Zaninah champion a hriat dawn ta

Indian football-a inelna sang ber leh ngaihhlut hlawh ber Indian Super League final chu zanin dar 7:30 hian khelh a ni dawn a, Mumbai City leh ATK Mohun Bagan-ten champion an inchuh dawn. 

ISL league round-ah team pahnih hian top two dinhmun an hauh a, team hmuhnawm leh ṭha ber pawl an ni - zaninah champion inchuhin an inkhel dawn e. 

Mumbai leh Bagan-te hi league round-ah khan an dinhmun a inang chiah - match 20 khelin vawi 12 ve ve hnehna an chang a, vawi li an khingpui inhnehtawkpuiin vawi li an tlawm ve ve bawk. 

Head-to-head a ṭha zawk Mumbai-in hmahruaitu ni chungin league round an khar a, season tharah Champions League an khelh dawn phah - Bagan-in final-ah hneh ngei an duh ang. 

Manchester City nena inzawm thar Mumbai-in pawisa an ngah a, coach atan game mawi khel ṭhin Sergio Lobera an thlem luh hnuah a player 'kawh' apiang an lakluh sak a, ISL-a sum hmang hnem pawl an ni. 

Tlarhma lama an chhuanvawr Adam le Fondre hi Premier League leh Championship pawh lo khel tawh a ni a, season hmasa khan A League lamah Syndey FC tan match 28-ah goal 21-a khung. 

ISL-ah match 22 khelin goal 11-a khung tawh a, a kawppui Bartholomew Ogbeche hian match 22-ah goal riat a khung - Paris Saint-Germain striker hlui hi NorthEast United leh Kerala Blasters tana lo khel tawh a nih avangin ISL-ah a mikhual lo. 

Mumbai club hian league round-ah khan goal 35 khungin anni aia goal khung hnem an awm lo a, Bagan tlarhnung lamah keeper ṭha Arindam Bhattacharja, defender Sandesh Jhingan, Subhasish Bose, Tiri leh Pritam Kotal-te hoin an theihna sang bera an khelhchhuah a ngai ang.

Lobera hnuaia game hmuhnawm khel ṭhin Mumbai tan an midfielder te an pawimawh a, Japanese midfielder Cy Goddard hi Serie B club Benevento aṭanga loan-a an hawh niin Tottenham Hotspur academy chhuak a ni a, kum 23 lek ni mah se game thlak danglam thei khawpin a thiam. 

Goa lama Lobera nena inhrawn tawh Hugo Boumous hian match 15-ah goal thum khungin assist vawi sarih a nei leh der tawh a, Ahmed Jahouh, Hernan Santana leh Rowllin Borges-te hi thai bo an thiang lo bawk ang. 

Tlarhnnung lamah Mourtada Fall bawk chu ban rinawm ni leh tura beisei a ni a, match 21-a khelhah defender ni chungin goal li a khung tawh bawk. 

League round-a team pahnih vawi hnih an intawnah khan Mumbai an chungnung zawk ve ve a, Bagan lamah goal thum an khung laiin Kolkata club hian goal an khung ve miah lo thung. 

Mumbai leh Bagan danglamna chu ISL-a tawnhriat an inneih ṭhat hleihna hi a ni. Mumbai player zingah ISL nomawi chawi tawh awmchhun chu Bidyananada Singh a ni a, ISL champion-a nihna hi kum 2016-a ATK-in champion nomawi an chawi kha a ni!

ATK Bagan erawh ISL champion lai an ni a, an player zingah Pritam Kotal, Jayesh Rane leh Prabir Das-ten nomawi an chawi leh a nih chuan ISL-a champion hnem ber record siamin an vawi thum champion-na tur a ni ang. 

Bagan coach Habas hian kum 2014 khan ISL season hmasa berah ATK a champion pui a, season hmasa khan a champion pui leh bawk - a tawnhriat ringawt pawh chhuan tham a ni. 

Mahse, league round vawi hnih an intawna an tlawm ve ve hian Habas-a ngaihtuahna a ti buai ang tih a chiang a, final-ah a tlawm leh a nih ngat chuan Valencia boss hlui tan hian mualphona a ni ang. 

A vawi khat nana ISL final lut Mumbai ṭhatzia sawi nawn a ngai lo a, anmahni tluk zeta sum ngah leh hmang hnem Bagan ṭhatna hi thup bo theih a ni bik lo. 

Tlarhmaah A League lama forward inkawp 'hot' ber ang hiala ngaih an nih laia an thlem luh Roy Krishna leh David Williams an kawl a, Krishna hian match 22-ah goal 14 leh assist pasarih a nei tawh a, David hian match 19-ah goal nga khungin assist vawi hnih a nei tawh.

Indian striker Manvir Singh hian match 22-ah goal ruk khunga assist vawi thum a neih avangin thai bo a thiang lo a, midfield-a Carl McHugh, Edu Garcia leh Javier Hernandez-te hi eng ISL club-ah pawh rinrawl ni phak tur an ni.

Hriat tel tur erawh Mumbai City hian league round-a goal an khung hnem ber piah lamah clean sheet vawi 10 neiin anni aia goal chhuah lohna match nei tam an awm lo a, Bagan-in vawi hnih an intawna goal an khung lohna team lakah champion tur chuan goal khung ngei an mamawh dawn.