Werner-a'n Chelsea a chhuahsan dawn?

Chelsea-a beisei anga season hmang lo Timo Werner chuan London club hi nipui transfer-ah a chhuak dawn niin khawthlang media-te chuan an tarlang leh tawh a, Bayern Munich nen sawizawm a ni mek. 

Kum 25 mi Werner hian nipui transfer khan Chelsea hi RB Leipzig aṭangin a zawm a, kum nga chhung atan contract ziakin a man zat hi pound maktaduai 47.5 lai a ni. 

Mahse, season hmasaa RB Leipzig tana match 45-a goal 34 khungtu hian German football angin Premier League-ah tlangnel a harsat a, tun season-a league match 27-a khelhah goal nga chiah a la khung. 

Germany international hian inelna hrang hrangah match 37 khela goal 10 khungin assist vawi kua a nei a, a beisei anga a khelh loh avangin nipui transfer-a chhuahna tur a dap mek niin a lang.

Werner a insiamṭhat hleihtheih loh lai hian a khelhna Chelsea erawh coach thar Thomas Tuchel enkawlna hnuaiah hma an sawn nasa hle - inelna hrang hrangah match 11 chu a zawnin an tlawm lo tawh. 

Kum 47 mi Tuchel hnuaiah Blues hian match 11-ah vawi riat hnehna an chang a, vawi thum an khingpui an inhnehtawkpui. Zanin dar 6:00-ah league match khel turin Leeds United an lenchilh zui leh ang. 

Chelsea hi an tlawm lo a nih chuan Chelsea coach zinga match hmasa 12-a tlawm lo record Maurizio Sarri-a lo siam tawh chu Tuchel-a'n a nihrual thei dawn a ni.