Gerrard-a Rangers an la tlawm lo

Scottish Premiership champion an nih aṭanga ni lina lekah Rangers chuan Europa League last 16 first leg khel turin Czech Republic an zin a, Czech club ṭha Slavia Prague chu 1-1 in an inhnehtawkpui. 

Round of 32 aṭanga Leicester City pet chhuaktu Slavia Prague hian minute sarihna lekah Nicolae Stanciu hmangin goal hmahruai an khung a, Rangers an hawihai. 

Mahse, Steven Gerrard-a enkawl mek team an ni miau a, Rangers-in tlawm an tum lo - minute 36-naah Filip Helander chuan si phurh sutna goal a khung ve leh a, hun tawp thlenga goal dang lut loin 1-1 in an inhnehtawk. 

Rangers hian goalkeeper Allan McGregor chu lawmthu hrilh mawlh mawlh tur an ni - kum 39 mi goalkeeper hian hun tawp hnaih lama Lukas Masopust-a ball tauh chu ṭha zetin a dang a, draw result nen Rangers an haw theih phah. 

Steven Gerrard hnuaiah Rangers hian league match ruk khelh tur la awm chungin league champion dinhmun an luah tawh a, match 32 an khelh tawhah an la tlawm miah lo.

Rangers hian Europa League lamah pawh qualification stage aṭanga tlawm nei loin last 16 an lut a, Slavia Prague an inhnehtawkpui leh tak avangin Europe lamah pawh an la tlawm lo zel tihna a ni. 

March 18 zanah Rangers hian league match an khelh leh hmain Slavia Prague hi last 16 second leg-ah an mikhual dawn a, khualmualah goal an khung avangin quarterfinal lut turin beiseina an nei sang khawp ang.