Real tana khel turin Messi ka pawm - Ramos

Real Madrid captain Sergio Ramos chuan Barcelona legend Lionel Messi chu Los Blancos tana khelh a duh a nih phawt chuan a tan hmun a awm thu a sawi chhuak. 

Kum 34 mi Ramos chuan, "Madrid-ah Messi hi ka pawm ang em? 100% in ka pawm thlap. Club-a a tlangnel theih nan kan chenna ina a awm ve pawh ka phal ang. Kei erawh

Barcelona tan ka khel ngai lo ang. Kum khata dollar maktaduai 50 emaw 70 emaw hlawh tur pawhin ka thei lo. Sumin a lei theih loh hi a awm a ni," tiin a sawi. 

Spanish defender Ramos hian Barcelona tana a khelh theih loh thu a sawi ang chiahin Messi tan pawh Real Madrid tana a khelh a rem lo. Cristiano Ronaldo chungchang sawi zuiin Ramos chuan, "Ronaldo chhuak kha Real Madrid tan channa a ni a, kei chu ni ila ka phal lo. Khawvela player ṭha ber zinga mi a ni a, a tel khan nomawi kan hnaih sawt a ni," tiin a sawi.

Ramos hian tun laia player langsar Erling Haaland leh Kylian Mbappe te chu Real Madrid tana khel turin a duh thu a sawi a, Spanish defender chuan, "An pahnih hian Real tan khel thei se ka duh. Chutihrualin sum vangin Mbappe lakluh a harsa dawn a, Haaland erawh a awlsam hret a rinawm. Haaland hi goal khung duha a tui hal avang te, a len ṭhat avang te leh a tlan chak avang tein a awhawm hle a ni," a ti.