Pep Guardiola faktu Parker

Premier League hmahruaitu Manchester City-in Pathianni zan dar 1:30-ah Fulham hmachhawn turin Caraven Cottage an tlawh dawn. Pep Guardiola hote hi champion ngei tura ngaih an ni a, Fulham erawh relegate thei dinhmunah an ding thung.

Fulham manager Parker chuan, "Pep Guardiola hi coach ṭha tak a ni a, an team inkhel hi minute nga chhung lek pawh en ila coaching ṭha an dawng tih a hriat nghal theih a ni. City lakah chuan inthlahdah a thiang lo a, engtik lai pawhin an hlauhawm reng. Chuvangin ṭan phat aṭangin fimkhur taka kan khelh a ṭul dawn a ni," tiin a sawi.

Nikum December 5 khan Etihad Stadium-ah Man City hian Raheem Sterling leh Kevin De Bruyne te goal hmangin Fulham hi an hneh tawh a, tun ṭumah pawh Pep Guardiola hote hi chak zawk tura rinkai an ni ang. London club hian Premier League-a Man City an hmachhawn hnuhnung 13-ah vawi khatmah chak an nei lo a, vawi 10 ngawt an tlawm a ni.