North London Derby Arsenal mikhual tur Tottenham

Arsenal lamin ropui zawkah an inngai a, an hmelma Tottenham Hotspur an indah hniam bik chuang lo. North London club pahnih hi Pathianni zan dar 10:00 hian Emirates Stadium-ah an intawng dawn.

Premier League champion tur zawnna a ni phak lo a, a sang pali zinga tel inchuh pawh an ni phak chiah lo. Amaherawhchu, team pahnih inhuatna leh chungnung zawk nih an duhzia ngaihtuah chuan inkhel hmuhnawm a ni ang.

League lamah beisei an phak lo a, an nomawi kawl lai FA Cup an hloh tawh bawk. Hun harsa tak tawngtu Arsenal-in tun dinhmuna chhuan tur an neih chu Europa League niin, an mikhualna ramah Olympiakos 3-1 in an luhchhuah.

Olympiakos an hneh hi Mikel Arteta-a'n Spurs hmachhawn tura inbuatsaihna ṭha a nih thu a sawi a, chak boruak nuam tak an neih hi an hmelma club lakah chhawm nun an tum ngei ang; Jose Mourinho naute hneh tur erawh chuan thapui an thawh a ngai ngei ang.

Ball keng ngam rawlthar Bukayo Saka a pawimawh leh dawn a, tun hnaia harh thar Willian-a tawnhriat pawh hman ṭangkai an tum ang. Gunners innghahna tur ber erawh striker Pierre-Emerick Aubameyang a ni ang, ani hian league match hnuhnung paliah goal li a khung a ni.

Arteta chuan, "Kan mamawh chu player theihna nei sang a ni a, chutihrualin an ṭhat dan bera khel chhuak thei a ni. Tun dinhmunah chuan Auba hi a dinhmun a ṭha, inkhel boruak sang leh pawimawhah chuan mamawh chhanna min pek leh ka beisei," tiin a sawi.

Arsenal hi Tottenham nen league match an intawn hnuhnung pahnihah an chak lo, kum 1974 October thla hnua a vawi khat nan ṭum thum chak lo zawn thei dinhmunah an ding mek, record ṭha lo siam ai chuan insiamṭhat an tum ngei ang.

Ningani zan khan Tottenham hian Europa League last 16 first leg-ah Dinamo Zagreb 2-0 in an hneh a, an goal pahnih hi Harry Kane khung a ni. English striker hian a khupah hliam tenau a nei a, hun tawp hmain lakchhuah a ni.

Spurs manager Mourinho chuan, "Kane hian kan mamawh engkim min tihsak, goal khungtu a ni a, siamsaktu a ni bawk. Team tan a thawhhlawk em em, tlarhma lama a ṭangkai ang bawkin hnunglam pawh a pui ṭha.

"A khupah hliam tenau a nei, na lutuk a nih loh hram ka beisei. Pathianni zana kan match khelh tur hi chu player zawng zawngin an khelh chak ang kha a ni a, ani pawhin harsatna lian tak a nei a nih ngawt loh chuan chawlh a duh lo ang," tiin a sawi.

Kane leh Son Heung-Min an inkawp leh a nih chuan Arsenal tlarhnung tan mangchhia an thlen leh ngei a rinawm. Anni pahnih chauh hi ven tur an ni dawn lo, tun hnaia harhtharna changtu Gareth Bale an la nei cheu bawk.

Real Madrid aṭanga an hawh Bale hi London khawpuiah a zuih mai dawn niin a lang hman. Mahse tun hnaiah a theihna tak a pho chhuak leh tawh; North London Derby boruak hi Bale tan thil thar a ni dawn lo - Gunners tlarhnung tan ven bik ngai a ni ang.