Rodgers-a'n Vardy chungah rinna a nghat

Leicester City boss Brendan Rodgers chuan a striker Jamie Vardy chuan match kua ngawt goal khung tawh lo mah se goal a khung leh thuai a beisei thu a sawi a, a striker chungah rinna a nghat. 

Kum 33 mi Vardy hian Premier League-ah goal 97 a khung tawh a, mahse tun hnaia inelna hrang hranga a inlan hnuhnung match kuaah goal a khung tawh lo. 

Rodgers chuan, "Goal a khung leh thuai ang tih hi ka ringhlel lo a, a chang chuan goal khung loh a kal tluan viau lai hi a awm ve tlat a ni," a ti a, Vardy chuan goal khung chu a hna ber a ni tih a hriatchian thu a sawi bawk. 

Vardy-a'n goal a khung hnuhnung ber chu December 21 kha a ni tawh a, khualmualah Manchester City chu 3-1 in an ngam lo. Hemi hnuah hian Foxes-in league match pakuaah vawi thum chiah hnehna an la chang. 

Carabao Cup-ah Aston Villa ngam loin an tlawm bawk a, semifinal-a inkhel pahnih belhkhawmah 3-2 in an chak lo. Foxes hian Premier League-ah pathumna dinhmun an luah mek a, pahnihna Manchester City chu point sarihin an phak lo mek. 

Rogers chuan goal khung chu Vardy hna bik chauh a ni lo tih sawi zuiin, “Goal 65 mamawh ila, mi pakhatin goal 40 ngawt a khung bik chu a dik lo ang. Team angin kan thawh ho a ngai a, hna kan thawh vek a ngai. 

"Roberto Firmino hi en teh u. Goal 10 chiah a la khung a, mahse team tana a ṭangkaizia chu kan hmu vek. Vardy pawh chutiang chu a ni - goal a khung loh lai pawhin a ṭhiante tan hmun awl a siamsak a, hna a thawk reng a ni," a ti. 

Hetihlai hian Rodgers chuan defender pahnih, kum 33 mi Christian Fuchs leh kum 36 mi Wes Morgan-te chu contract thar an zawrh mek thu a sawi. 

Leicester City hian zanin dar 1:30-ah Premier League match an khel dawn a, table mawngphah luahtu Norwich City chu khualmualah an lenchilh dawn a ni.