Chelsea leh Leeds United an inhnehtawk

Inrinni zan khan Elland Road-ah Leeds United-in Chelsea an mikhual a, goal awm loin an inhnehtawk. Thomas Tuchel-a'n London club a enkawl hnuah hneh loh a la tawng lo a, amaherawhchu Leeds nen an inhnehtawk erawh point hnih an hlohah a ngaih theih.

Chelsea hian match 29 an khelh tawh aṭangin point 51 an hmu a, palinaah an awm mah se West Ham leh Everton ten a hlat lo. Season thara Champions League khelh tum tan chetsual a thiang tawh lo a, champion lai Liverpool meuh pawh pariatnaah an awm avangin Europe-a inlan theih hi hlawhtlinnaa chhiar theih a ni ang.

Chelsea-in bul an ṭan ṭha a, pound maktaduai 71 man Kai Havertz-a'n chance ṭha hmasa chu goal-ah a chantir thei lo. Mualneitu Leeds United an hlauhawm zui a, Patrick Bamford-a ball pek chu Tyler Roberts-a'n goal ruakah khung mah se Bamford hi a offside hman avangin pawm a ni lo.

Leeds defender Luke Ayling-a ball petchhuah tumin a khelhpui Diego Llorente a pet per a, ball-in keeper Illan Meslier khumin crossbar a per. Chelsea-in chance ṭha bik insiam an harsat a, chutihrualin goal theihna tura ngaihah Havertz-a'n a pet kil tawk loh avangin keeper Meslier-a'n a dansak.

Chelsea-in inkhel thunun zawk mah se keeper Edouard Mendy puihna an mamawh a, Senegalese keeper hian Raphinha goal khung tur chu a dang ṭha takzet. Minute 90 chhungin goal hmuh tur a awm lo.

Chelsea-in Thomas Tuchel hnuaia match 12 an khelhah hneh loh an la tawng lo. German manager Tuchel chuan, "Kan hun ṭha neih hmang ṭangkai turin theihna kan nei a, tun ai khan tlarhmaah hriam kan mamawh. Chutihrualin ka mawhphurhna a ni a, goal kan nawr nat theih nan ṭan ka la ang," tiin  a sawi.

Player theihna nei sang Havertz bakah Mason Mount, Hakim Ziyech leh Christian Pulisic ten goal an khung lo mah se Tuchel-a'n mawhphurhna a la. Chutihrualin Chelsea hian 61.9% ball possesion an nei a, Leeds United-in 38.1% chauh ball an chang tihna ni. Marcelo Bielsa hnuaia Leeds United-in ball an chan tlem ber ṭum a ni.

Chelsea hian March 17 Nilaini zanah Atletico Madrid an mikhual dawn. Tuchel-a hote hian Champions League last first leg-ah Atletico hi 1-0 in an hneh a, Stamford Bridge-ah second leg hi khelh a ni ang.