Indian Super League champion Mumbai City

India rama football inelna ngaihhlut hlawh ber Indian Super League champion a hriat ta a, Mumbai City chuan ISL nomawi chawi turin ATK Mohun Bagan chu 2-1 in an hneh.

Mohun Bagan tan David Williams chuan goal hmahruai khung mah se Mumbai Club-in Tiri (own goal) leh Bipin Singh hmangin an chhanglet a, a tawpah 2-1 in an chak. 

Mumbai City hian league round hmahruaitu ni chungin semifinal an lut a, tunah an champion zui ta - ISL-ah Bengaluru (2018-19) leh Mumbai chiah hi league hmahruaitu leh champion ni kawp thei an la ni. 

City coach Sergio Lobera chuan, "Ka lawmzia hi thua sawifiah theih chi pawh a ni lo," tiin a sawi a, season hmasaa FC Goa-in an ban tak coach hi ISL champion a ni ta. 

Fatorda Stadium-a inkhelah team pahnihin chance an nei lawk lo a, minute 10 chhung chu ISL final a ni lo emaw tih mai turin game a dul  a, Mumbai-in penalty an beisei laia pek an nih loh avangin game a nung thar thut. 

Adam Le Fondre chuan Bipin Singh tan hun ṭha a siamsak a, mahse, Manipur winger hi Pritam Kotal chuan a ti tlu - Mumbai hian penalty an hlawh chhuakah an inngai a, mahse, referee-in ngaihdan dang a nei thung. 

Mohun Bagan an hlauhawm ve zui nghal a, mahse, Javier Hernandez chuan freekick hmangin crossbar bak a pet per thei lo - minute 18-naah Bagan an vannei ta nge nge a, Roy Krishna chuan Ahmed Jahouh ball khawih tur lo khawih khalhin Williams tan a siamsak. 

Kum 33 mi striker hian ngaihtuahna seng tam loin goal-ah na takin a pet a, Mumbai keeper Amrinder Singh tan dan ngaihna a awm lo.

ISL champion lai Bagan-in goal an khung a, champion rim an nam leh ṭan - mahse, an hlim chhung erawh a rei lo. 

Goal an khung aṭanga minute 11 hnu lawkah Tiri-a chesual a, Bagan defender hian Jahouh-a long ball tauh chhuah a tumna lamah an lamah a tauh lut!

Islanders (Mumbai sawina) an hlauhawm chhunzawm a, Hugo Boumous-a hun neih ṭhat chu Arindam Bhattacharya chuan ṭha zetin a dang - Krishna chuan Bagan tan chance a nei ve leh a, mahse, goal zawnah a pet thei lo. 

Chawlhlawk thlengin goal dang a lut lo a, team pahnih an inhlauh loh tawn miau avangin chak tur zawk rinthiam a harsa. 

Chawlhlawk hman a nih hnuah Bagan-in rawn nawr nghal mah se Mumbai keeper tan hna harsa an siamsak thei lo a, Raynier Fernandes leh Hernan Santana-te hun ṭha chu Arindam chuan a dansak. 

Mumbai an vannei hleithei lo - minute 58-naah Le Fondre-a shot chu Arindam chuan a lo dang per a, Boumous-a ke bulah tak tla mah se French midfielder hian goal ruakah a khung thei lo!

Bagan tan Hernandez a inlar leh a, a freekick chu Mumbai defender Mohamad Rakip chuan an lamah a ti lut niin a lang - mahse, goal luhnaah offside position-a awm Roy Krishna a inrawlh niah referee-in a ngai a, pawm a ni lo. 

Hun tawp a hnai a, extra time khelh a ngai dawnin a lang hman. Mahse, minute 90-naah Bagan keeper Arindam a chesual a, Mumbai striker Bartholomew Ogbeche-a'n duhthala Bagan tlarhnung a bum hnuah Bipin Singh-a ke bulah ball a lir a, Manipur winger hian goal ruakah chakna goal ni turin a chhuih lut - Bagan tan thawhlehna hun a awm tawh lo. 

Coach vang ringawta hlawhtlinna a ni lo hian min tilawm a ni - nomawi chawi i duh chuan player ṭha tak tak i neih a ngai a ni. Nomawi chawi chunga club tana thawnthu thar ziah hi thil awlsam a ni lo a, thil ropui tak kan ti a nih hi. 

Season ṭantir aṭanga a tawp thleng khan chona kan hmachhawn kha a hautak hle. Pre-season nei ṭha lo tak chungin inkhunghran a ngai a, game kan khel zing em em bawk. Mahse, tunah chuan nomawi chawi chungin kan hnathawhte kan thlirlet a, kan vaia thawhrah a ni tih kan hria. Kan tum ram chu kan thleng ta. 

ISL Emerging Player of the League atan Mizo rawlthar Lalengmawia (Apuia) chu thlan a ni a, NorthEast United midfielder pawimawh chuan, "Delhi lama ka chhungte nen an puan dawn khan kan thlir ṭhup a, ka hming an lam chiah kha chu sawi ngaihna pawh ka hre lo. Ka lawm hi a ni tawp mai," tiin award a dawn chungchang Vanglaini a hrilh. 

Apuia hian ISL-a Highlander match 22 a khel kim vek a, semifinal an luh theih nan player ṭangkai leh thawhhlawk a ni - tackle vawi 93-a nei a, vawi 46 interception a nei a, an tlarhnung phui nan a thawhhlawk hle. 

Kum 20 leh ni 45 mi ni chunga ISL captain naupang ber record lo siam tawhtu Apuia hian season hman zawh takah khan goal khat a khung a, a pass dik percentage hi 74.47% a tling. 

Vawiina India national team camp zawm tura Dubai pan tur Apuia chuan, "Season bul ṭan chhe lo mah ila mimal chawimawina dawn lamin ka rilru a tibuai hran lo. 

"Mahse, season laihawlah khan Emerging Player of the League thlan a nih tur thu min hrilh a, dawn tum ngei tur pawhin min fuih nasa hle. Kan team-in hma kan sawn chhoh hnu khan beisei pawh ka beisei ve deuh. 

"Mahse, player ṭha dang tam tak an awm avangin beisei viau erawh a harsa a, a bul berah chuan Pathian zara dawng ka ni a, ka lawm takzet," tiin Vanglaini a hrilh. 

Hero of the match-a vawi li ngawt thlan Apuia chuan, "Season tluana inhliam lo leh ṭha taka min khelhtirtu Pathian hnenah lawmthu ka sawi. Ka chhungte min thlawpna avanga tun dinhmun thleng thei ka ni a, ka khelhpuite avanga he award dawng thei hi ka ni bawk - min ṭantu fan-te chungah ka lawm em em bawk," tiin Vanglaini kaltlangin lawmthu a sawi. 

ISL season hman zawh taka Indian player zinga Hero of the Month (February)-a thlan awmchhun Apuia hi Oman (March 25) leh United Arab Emirates (March 29) hmachhawn tur India squad-ah Chennaiyin forward Lallianzuala Chhangte nen Mizo awm an ni. 

International friendly match khel tur India hi March 15 aṭangin Dubai khawpuiah an camp dawn a, player 35 aṭangin player 28-ah tihhniam leh tur a ni - Apuia leh Lianzuala tan hmun chang turin ṭan a ngai ang. 

ISL hi kum 2014 aṭang khan khelh ṭan a ni a, ISL Emerging Player vawi sarih thlan ni tawhin Mizo hming vawi li ngawt a lang tawh. Apuia hma hian Jeje Lalpekhlua, Jerry Lalrinzuala leh Lalruatthara te thlan an ni tawh a ni.

Hero of the League - Roy Krishna, Mohun Bagan

Fijian striker hian match 23-ah goal 14-a khung a, assist vawi riat a nei bawk. 

Golden Boot - Igor Angulo, FC Goa

Athletic Bilbao striker hlui hian ISL-a a season hmasa berah Goan club tan match 21 khelin goal 14-a khung a, Krishna nen an goal khung zat inang mah se khelmualah minute a hman tlem zawk avangin top scorer dinhmun hi a luah. 

Golden Glove - Arindam Bhattacharya, Mohun Bagan

Kum 31 mi keeper hian goal 19 chiah tun season-ah a chhuah a, Mumbai City keeper Amrinder Singh nen clean sheet vawi 10 ve ve nei mah se khelmualah minute a hman tlem zawk avangin Golden Glove hi a dawng. 

Winning Pass of the League - Alberto Noguera, FC Goa

Kum 31 mi midfielder  Alberto Noguera hian assist vawi riat a nei a, Roy Krishna nen assist an neih zat inang mah se minute 191.62 dana assist a neih anga chhut chu Krishna (257.75) aia a ṭhat avangin he award hi a dawng. 

ISL Emerging Player of the League - Lalengmawia, NorthEast United