Tualchhung Cricket Bawngkawn lakah Zarkawt chak chiang
An match hmasa zawka an chak loh hnuah Zarkawt Lords chuan hnehna an chang ve ta. Inrinni chhun Mahuma Memorial 1st Division Screening Tournament-ah Lords hian Bawngkawn South chu run 131 in an sawp.
Suaka Cricket Ground, Sihhmuia inkhelah Zarkawt lam hi ṭhum vawrah an vannei zawk a, vuak hmasak an thlang. Lalhruaizela chuan ball 140 a hmachhawn aṭanga run 118 siamin a thawhhlawk hle - C. Vanlalṭhafamkima chuan run 89 a siam bawk.
Lords hian over 50 chhungin run 255 an tlin a, mi pali chauh an thi; target sang tawk tak an siam. Bawngkawn lamin Lords ball vawm thiam Naveen Aayush Gurung an ngam lo, ani hian over kua a vawm aṭangin wicket ruk ngawt a la.
Bawngkawn hian run 124 bak an siam thei lo, over 34.1 chhungin an thi vek. Lords hi Kulikawn an hneh loh hnuah an insiamṭha nghal a, chak lo Bawngkawn South erawh match hnih an khelh aṭangin chak ni hmel an la hmu lo.
Inrinni khan Khaled Memorial 2nd Division Screening Tournament chu Durtlang khelmualah khelh chhunzawm a ni ve bawk. Gorkha Rising chuan Chaltlang lakah run 56-in hnehna an chang, vawiin hian a hmun ngaiah inelna a awm leh ang.
Mahuma Memorial (1st Division)
A hmun: Suaka Cricket Ground, Sihhmui
Vawiin Inkhel Tur
Kulikawn 09:30 AM Chanmarians
March 13, Inrinni
Zarkawt Lords bt Bawngkawn South
(Zarkawt Lords hi run 131-in an chak)
Toss: Zarlawt Lords lamin vuak hmasak an thlang
PoM: Naveen Aayush Gurung, Zarkawt Lords
Khaled Memorial (2nd Division)
A hmun: Durtlang Khelmual
Vawiin Inkhel Tur
Legends 09:30 AM Venghnuai Raiders
March 13, Inrinni
Gorkha Rising bt Chaltlang
(Gorkha Rising hi run 56-in an chak)
Toss: Chaltlangh lamin vawm hmasak an thlang
PoM: Sagar Sunar, Gorkha Rising