Lewy-a'n goal a khung zel

Robert Lewandowski chu Bundesliga goal khung hnem pahnihna a ni ta. Lewy hian Werder Bremen lakah goal khat khungin Bayern Munich chu 3-1 in hnehna a chan pui a, table chung berah an awm chhunzawm.

Bayern striker Lewandowski-a'n Bundesliga bikah goal 268 a khung tling chiah - German football inelna sang berah hian Klaus Fischer a nih rual. An chungah hian Gerd Muller (365 goals) chiah a awm ta, pakhatna tluk tur chuan hun a la mamawh rei deuh ang.

Bremen muala inkhelah Leon Goretzka leh Serge Gnabry ten chawlhlawk hmain goal an khung, an goal hmasa pahnih hi Thomas Muller siamsak ve ve a ni a, khualmualah dinhmun ṭha takah an ding.

Lewy-a'n second half minute 67-naah an goal thumna a khung a, hun tawp dawnah Bremen lamin counter attack aṭangin mawi zetin an vaw let a, striker Niclas Fullkrug-a'n khung mah se Bremen mualpho a hliah khuh phak tawh lo. 

Poland international striker Lewandowski hi a vanneih zan ni se chuan goal khat aia tam a khung ang, goal ban vawi hnih a tih per bakah bar a tih per bawk - a vanneih zan a ni lo, chutihrualin season kal laiah league goal 32 a khung tling tawh.

Bundesliga season khata goal khung hnem ber chu Muller niin; Beyern legend hian 1971-72 season khan goal 40 a khung, season kal laiah Lewy hian match khelh hmabak pakua a la neih avangin goal 40 khung tlin theihna hun a la nei.

Inrinni zan inkhel dangah Borussia Dortmund chuan, Germany midfielder Julian Brandt leh kum 16 mi Youssoufa Moukoko te goal hmangin Hertha Berlin 2-0 in an hneh. Dortmund hian point 42 hmuin pangana an ni a, season thara Champions League khelh an beisei zel.