City tan Aguero-a'n goal a khung

Manchester City-in Inrinni zan khan Fulham 3-0 in an hneh a, January 2020 hnua a vawi khat nan Sergio Aguero-a'n Premier Legue-ah goal a khung.

Craven Cottage-a inkhelah first half-ah goal a lut lo a, second half minute 15 chhungin John Stones (47'), Gabriel Jesus (56') leh Aguero (60') ten goal khat ṭheuh an khung.

Man City-in first half inkhel an thunun a, Fulham keeper Alphonse Areola a che ṭha hle. Second half-ah erawh Scott Parker-a hote an ṭang rei thei lo.

Minute 47-naah Man City wing back Joao Cancelo freekick pet chu Stones-a'n a ti goal. Minute 56-naah Fulham defender Joachim Andersen pet chhuah sual chuan Ivan Cavaleiro perin Jesus-a tan hna harsa a awm tawh lo - Brazilian forward hian keeper Areola bumin a pet goal.

Fulham defender Tosin Adarabioyo a chesual leh a, Ferran Torres laka ball a hloh hnuah Spanish winger hi box chhungah a ti tlu a, penalty a chawi. Aguero rawn pen chhuakin goal-ah a chantir a, 3-0 in inkhel a tawp.

Argentine forward Aguero tan Fulham laka a penalty khung hi tun season Premier League-a a goal hmasa ber a ni ringawt lo a, January 2020-a Sheffield United nen an inkhelh hnunga a goal khung lehna hmasa ber a ni. 

Man City forward goal khungtu ropui hian ni 417 chhung goal a khung lo. League-ah hian inhliam vangin match a khel tam tawk lo a, chuti chung chuan match 13 chhung goal a khung tawh lo a, minute 641 a khelhah goal khung loin hun a hmang. 

Aguero hi tun season Premier League-ah match riat chiah a inlan a, Pep Guardiola hian a team a khelhtir dan hmangah forward a ngai pawimawh tawk lo. Argentine forward hi Brazilian forward Jesus nen February 2020 hnua an inkawp lehna hmasa ber a ni. Chutihrualin Aguero leh Jesus ten match 13 chhung bul an ṭan kawpah goal 24 an khung.

Kum 32 mi Aguero hi season tawp rualin a contract a zo dawn, a hmalam hun a chiang lo. Pep Guardiola chuan Aguero hmalam hun hi international break laia a ngaihtuah tur thu a sawi a, Man City tana goal khung tam ber record chelhtu ni mah se Etihad Stadium-ah a cham zel a rinawm lo zawk.

Manchester City-in March 16, Thawhlehni zanah Borussia Monchengladbach an hmachhawn dawn a, Fulham lakah Guardiola-a'n player ṭha a chawlhtirah a ngaih theih.

City goal nawrna ber pakhat Raheem Sterling chu squad-ah an awm lo a, bench-ah chhawr loin Kevin De Bruyne, Ilkay Gundogan, Riyad Mahrez, Kyle Walker leh Phil Foden te an awm a, an squad chhahzia  lang.

Manchester City manager Pep Guardiola chuan, "Player kan khelh kualtir avangin Budapest-ah player inpeih ṭha tak kan chhawr thei ang. Player khelh kim tir vek ka duh avang hian player hian ka ngaihdan an ṭawm loh chang a awm a, amaherawhchu season tawp thlenga ṭha taka khel tur chuan kan inthlak kual hi a ṭul a ni," tiin a sawi.

Pep Guardiola hote hian Covid-19 inkaihhruaina vangin Gladbach hi Etihad Stadium-ah an mikhual thei dawn lo a, Puskas Arena, Budapest-ah an hmachhawn ang. Man City hian Premier League match 30-ah point 71 an hmu tawh avangin Champions League-ah an insawrbing thei ang.