Muguruza hun a thleng ve leh ta

Garbine Muguruza-i'n kum hnih deuh thaw nomawi a chawi loh hnuah a hlawhtling ve leh ta. Inrinni zan Dubai Championship-ah Spanish nula hian Barbora Krejcikova chu 7-6 (6), 6-3 a hnehin a champion.

World number 1 hlui hi season kal laiah a khel ṭha, final pawh vawi thum a khel tawh - a hmasa pahnihah hlawhtling lo mah se tunah chuan a hun a thleng ve leh ta. Krejcikova lakah hian aces vawi sarih a siam a, a khingpuiin break point vawi kua a hmuh zinga pasarih chu a inchhanhim.

Kum 27 mi Muguruza chuan, "Inkhel ṭhenkhatah chuan vanduai chang a awm, a bik takin kumina final ka khelh tawhah khan ka vanduai ve ṭhin hle. Tunah erawh vanneihna chu ka lamah a ṭang ve leh ta, nomawi hian inrintawkna pawh min siamsak ngei ang," a ti.

World number 16 hian season kal laiah match 18 hnehna a chang tawh. Dubai khawpuia hlawhtlinna a chan hian nomawi pariat a la tling ta chiah a, heng zingah hian Grand Slam title pahnih - French Open 2016 leh Wimbledon 2017 a tel.