Real Madrid Vs Man City Part 1 Pep Guardiola hoten Santiago Bernabeu luhchhuah

Manchester City-in Europe zinkawng danglam bik an zawh chho a, Nilaini zan khan Santiago Bernabeu-ah mualneitu Real Madrid 2-1 in an hneh. Spanish club-in Isco hmangin an khung hmasa a, Gabriel Jesus leh Kevin de Bruyne te goal hmangin English club-in an lehthal. Man City-in an club history-a Los Blancos an hnehna hmasa ber a ni.

Real Madrid leh Man City inkhel part 2 hi March 17, Thawhlehni zan hian Etihad Stadium khelh a ni dawn. Pep Guardiola chuan, "Hetiang dinhmun aṭanga tho chhuak thei club an awm a nih chuan Real Madrid ngei hi an ni," tiin inkhel hmuhnawm zawk a la awm tur thu a sawi.

December thla khan Champions League last 16-a inhmachhawn tur pawh a ni a, Man City-in an hmachhawn tur an hriat chiah khan Pep Guardiola hna a inṭan. Spanish manager hian Real Madrid zir chian hna a ṭan nghal a, an intawn hmasa zawka hnehna an chan chhan bulpui ber a ni.

Guardiola hian first leg-ah Raheem Sterling, Sergio Aguero, David Silva leh Fernandinho te bench-ah a dah a, Bernardo Silva leh De Bruyne te chu 'false nine' hna inthawh chhawk turin an awm. Starting eleven zinga forward tia sawi theih awm chhun Gabriel Jesus chu mualsirah a awm thung.

Barcelona manager hlui hian hetiang thutlukna a siam chhan hi Real Madrid inkhel a zir chian vang a tih theih. Zinedine Zidane-a hote hian December thlaa Barcelona nen an inkhelh ṭumin Catalan club defender-te ball in pass tur thlengin an veng a, Nou Camp-ah huaisen taka an khelh theih avangin Man City lakah pawh an ngam ang tih chu Pep-a thutlukna a ni.

Spanish manager hian midfield a ti phui a, goal venhim a ngai pawimawh hmasa. Pep hian Jesus a hrechiang a, mual sir aṭanga duh ang thala a chet chuan dan a harsa tih a hria, Brazilian forward hi Raphael Varane, Sergio Ramos, Casemiro leh Federico Valverde te hmanga Real tlarhnung phui ṭha tak pawh darh nan a hmang.

Guardiola hian Real player zingah kum 21 mi Valverde chu a hriat chian loh a nih avangin a zir uluk thu inkhelh banah a sawi lang bawk.

Europe-a vawi 13 champion tawh leh inelna hnuhnung paruka vawi li champion thei Real Madrid leh tun hnaia nasa taka hmasawn Manchester City inkhel a nih miau avangin inkhel a nung.

Goal chance erawh hmuh tur a awm lawk lo a, minute 20 hnuah Jesus-a goal khung tur chu Thibaut Courtois-a'n ṭha takin a dang.

City keeper Ederson pawhin darkar chanveah chiah Karim Benzema ball tauh chu ṭha takin a dang. City defender Aymeric Laporte minute 33-naah a inhliam a, Fernandinho-a'n a thlak.

Hun chanve hma lamah midfield battle a hmuhnawm a, injury time-ah Jesus volley chu Ramos-a'n an lamah a ti lut teuh hle.

Second half-ah Man City inkhel a nung zawk a, Riyad Mahrez a hmuhnawm. Real Madrid chhanhimtu chu Courtois a ni a, goal an chhuah miau loh avangin beiseina an nei zel.

Minute 60-naah Brazilian rawlthar duhawm Vinicius Junior chuan fing takin Isco a pe a, Spanish midfielder hian Ederson-a dan hman lohin goal kilah a khung.

Real an phur a, Ramos-a'n goal hnihna a khung teuh hle. Pep-a'n khelh dan thlak a ṭul tih hriain Bernardo Silva aiah Raheem Sterling a luhtir a, English club goal nawr a na sawt.

Minute 78-naah Kevin de Bruyne corss chu Jesus-a'n a tauh lut a, siphurh sutna a nih bakah 'away goal rule' hlu tak a ni.

Minute li hnuah Sterling-a'n box chhungah ball la lutin Daniel Carvajal hlau thawngin a ti tlu a, referee-in penalty spot a kawk. Premier League-a vawi li a zawna penalty pet goal tawh lo Man City tan De Bruyne rawn pen chhuakin Belgian midfielder hian a hnampui Courtois a bum.

City-in goal venhim tum loin an la nawr chhunzawm a, Jesus-a ball la lut tur chu box pawnah chiah Sergio Ramos-a'n a ti tlu. Real Madrid captain hian goal khat hum mah se red card a hmu a, second leg a khel thei dawn lo. Spanish defender hian Champions League-a red card vawi li a hmuhna a ni a; Edgar Davids leh Zlatan Ibrahimovic te hmuh zat a nihrual chiah.

Chak tumin Santiago Bernabeu kan tlawh a, kan hlawhtling. Tun hi a chanve chauh a la ni a, hetiang dinhmun aṭanga tho chhuak thei club an awm a nih chuan Real Madrid ngei hi an ni.

A khel ṭha zawk kan nih laiin goal kan chhuah. An khelh ṭhat laiin goal kan khung ve thung. Football-ah chuan hetiang hi a thleng chawk. Anfield-a quarterfinal kan khelh ṭum khan kan khel ṭha a, Liverpool-in goal zawna an pet zawng zawng an khung.

- Pep Guardiola, 

Manchester City manager

––––––––––––––––––––––––––––––––

Kan khelh ṭhat avangin kan result hi pawm a harsa. Hun tawp lam minute 10 khan inkhel kalhmang a thlak vek a ni. Team ṭha pahnih kan inkhel a, hun tawp lamah kan talbuai. Kan tihsual kan en let ang a, ṭha zawkin kan khel ang.

Quarterfinal thlen kan duh a nih chuan Etihad Stadium-ah chak beiseina nen kan lut ang. Kan khelh dan tur kan la hrethiam lo a, chak erawh kan tum hle.

- Zinedine Zidane, 

Real Madrid manager

––––––––––––––––––––––––––––––––