Russia-ah mi 200 hreng

Russia eptu hruaitu, Alexei Navalny an hren avanga amah thlawptu pungkhawm mi 200-te chu kar liam ta Inrinni khan hren an nih thu Russia Ministry of Internal Affairs chuan a tarlang.

Moscow-a pungkhawm mi 200-te hi eptu party hruaitute leh minicipal deputy-te an ni. Hemi chungchangah hian US secretary of state Antony Blinken chuan Russia chu an mi hrente hi chhuah turin a ngen nghal a ni. Antony chuan miin zalen takin an duh lohna te an auchhuahpui thei a, hei hi hupbehsak an ni tur a ni lo, tiin Russia sorkar chu a sawisel.

Russia prison service chuan eptu hruaitu hian ṭum tam tak a probation period a bawhchhe tawh nia sawiin, nikum December 29 aṭang khan man theih reng a ni tawh tih a tarlang. Moscow Court chuan kumin February 2 khan Navalny hi kum 2 leh thla 5 a tan dawn thu a lo tarlang tawh bawk. Hei bakah Russia prosecutor-te chuan tun hnaiah Navalny hi a foundation din, Anti-Corruption Foundation leh charity dang tana sum an dawnte a mimal tana hmanga puhin thubuai an siam thar sak bawk. 

Kum 44 mi, Navalny hi nikum August 20 khan Seberia aṭanga Moscow pana thlawhtheihnaa a chuan laiin nikhaw hre loin a awm a, Siberia hospital-ah ni hnih enkawl a nih hnuin Berlin, Germany-ah lak a ni. Berlin-a enkawl a nih hnu hian European expert-te chuan Navalny hi tur chi khat, Novichok nerve agent hmanga hrai niin an sawi a, mahse hei hi Russia chuan a pawm lo thung. Germany official-te chu tura hrai a ni tih finfiahna pe turin an phut a, Germany-a hruai a nih hma hian Navalny taksaa tura hrai a ni tih lanna engmah a awm lo a ni, an ti. 

Kumin January 31 khan Russia khawpui hrang hrang 85-a Navalny thlawptu mi 5,000 chuang chu sorkar chuan a lo hreng tawh bawk a ni.