Khatla TBL hmaah Chanmari Vikings

Mizoram Super League khelh laiah zanin hian match pahnih a awm dawn, vawi hnih champion tawh Khatla TBL leh team thar Chanmari Vikings te chu dar 5:30-ah an intawng dawn.

Nizan khan Zarkawt BCA leh Ramhlun Sporting Club an inkhel a, result kan hre hman lo. Zanin dar 7:30-ah champion lai BCA hian match hmasa bera hnehna chang tawh Tuikual South an hmachhawn zui leh nghal ang.

Khatla TBL hian United States aṭangin Xavier Dupree an chah lut a, American forward hi zaninah a inlan ang. Punjab player an ziah luh Arshpreet Singh Bhullar  erawh Basketball Federation of India (BFI) hrem lai a nih avangin an chhawr thei dawn lo.

TBL coach Lalrinzuala chuan, "Dupree hian kan training a zawm pangngai tawh a, ram danga inkhel zo hlim a nih avangin fitness pawh a ṭha hle. Court chhungah a nuam tih dan berin kan khelhtir ang, tualchhung player nen pawh an in man ka beisei," tiin Vanglaini a hrilh.

An player Bhullar chungchang sawi zuiin Rinzuala chuan, "Tip Off zan khan chawpchilh takin a khelh theih loh tur thu kan hre chauh. BFI lam aṭangin hrem a nih hi hriattirna kan dawng lo a ni. Tunah chuan kan player neih ang kan hman thiam leh zual a ngai dawn," a ti

.

Chanmari Vikings hi MSL-ah team thar an ni, mahse tun hma lamin Mission Veng Vikings ni chungin an inlan tawh. Vikings an nih laia champion pui tawhtu coach H. Lalhruaitlunga kaihhruai an nih avangin an zam bik lo.

Vikings coach Hruaia chuan, "Tualchhung player kan neih te hi an mahni tawkah an fitness a ṭhat lai ber a nih ka ring a, vanglai hmang an ni bawk. An lakah beiseina ka nei sang, team ṭha hmachhawn tur ni mah ila keini pawhin chak tumin kan khel ang," a ti.

February 26, Nilaini khan Vikings player tur Ray Miller chu a rawn thleng chiah. Nizan khan team training a zawm nghal a, zaninah a inlan a rinawm. Hruaia chuan, "Thailand lama tournament khel zo hlim a ni a, harsatna nei loin a khelh theih ka beisei," tiin Vanglaini a hrilh.