Warriors lakah Rockets an chak

Houston Rockets chuan Golden State Warriors lakah tlawm mai an tum bik lo. James Harden awmna Rockets hian nimin zing khan an mikhual hi overtime an khelhpui hnuah 126-121 in an hneh a, Western Conference semifinal series-ah GSW lamin series 2-1 in hma an la hruai.

Toyota Center, Houston-a game 3 inkhelah team pahnih an inkhel tawk hle a, mikhual lam tan Kevin Durant chuan point 46 ngawt nei mah se a ṭhiante zingah point 20 nei tling an awm thei lo - game hmasa pahnihah harsa lutuk loin hnehna chang mah se Rockets mualah erawh a awlsam ta bik lo.

Rockets tan point 41 neitu Harden chu player pawimawh a ni leh a, ani bakah hian point 30 score-tu Eric Gordon chu a thawh hlawk hle bawk. Houston coach Mike D'Antoni chuan, "Inkhel a la zo lo, Harden khan a nihna tak a lantir leh ta, game hmabak atan kan inbuatsaih zui ang," a ti.

Western Conference semifinal lehlamah Portland Trail Blazers leh Denver Nuggets te pawh an inkhel tawk hle. Inrinni zing inkhelah team pahnih hian over time vawi li ngawt an khelh hnuah Blazers lamin 140-137 a hnehna changin series-ah 2-1 in hma an hruai bawk.

Vawi 24 ngawt hmahruaitu an inthlak a, inkhel tawp nan second 2.8 chauh a awm tawh tihah Seth Curry chuan Blazers chakna tur basket a khung. Boston Celtics leh Syracuse Nationals te chuan March 1953 khan NBA playoff-ah hian overtime vawi nga an khel tawh a, NBA playoff khelh tawh chinah chuan inkhel rei ber pahnih a ni.