Juve tlawm tur chhantu Ronaldo
Cristiano Ronaldo chuan Juventus tlawm mai tur chu hun tawp dawna a tauh luh hmangin a chhanhim a, Zirtawpni zan Derby della Mole-ah Juve leh an mikhual Torino chu 1-1 in an inhnehtawk.
Mikhual lamin minute 17-naah Sasa Lukic hmangin goal hmahruai an khung a, hun rei tak chhung an goal an venhim theih avangin tun hnai kum 24 chhunga a vawi khat nan Juventus an hneh ngei dawn niin a lang hman.
Mahse, Italian champion hian club dang neih ve loh Ronaldo an nei. Portuguese forward hian tun season chhunga a league goal 21-na ni turin Leonardo Spinazzola-a cross chu minute 84-naah a tauh lut. Goal dang lut loin team pahnih ten point khat ve ve an insem.
Season thara Champions League khelh tum Torino hian Serie A bika an point hmuh hnem record 57 chu an nihrual a, an beisei UCL ticket erawh an duh angin an la hnaih thei lo. Table-ah parukna niin palina Atalanta aia match khata khel hnem chungin point hnihin an hniam zawk.
Italian champion Juve manager Massimiliano Allegri chuan, "Kar hnih liam ta khan kan champion tih a chiang tawh a, chumi chung chuan team ṭha lakah ṭha takin kan la khel zui thei. Player tin inpekna a sang a, a tam thei ang ber point hmu chungin season khar kan tum ang," tiin a sawi.