Sudirman Cup atan player ṭha
Ram leh ram mipa leh hmeichhe badminton team hmanga inelna Sudirman Cup chu May 19-26 chhung hian Nanning, China-ah khelh a ni leh dawn a, inelna hmachhawn tur hian Badminton Association of India (BAI) chuan a player neih ṭhat a tir chhuak dawn.
Inelna neih hnuhnung berah khan India hian quarterfinal a thleng a, kuminah hian China leh Malaysia te nen Group D-ah an awmkhawm. Group pakhat aṭangin a sang pahnih chiahin knockout stage an luh dawn avangin Indian shuttler-te hna a awlsawm dawn lo.
India tana feh chhuak tur zingah hian P.V. Sindhu, Saina Nehwal leh Kidambi Srikanth te chu player pawimawh leh innghahna an ni ang. Nikum Commonwealth Games final-ah khan India hian Malaysia chu an ngam tawh a, kuminah hian an thiampuipa world number 1 hlui Lee Chong Wei a awm theih dawn loh avangin beiseina a sang zual ang.