Chhinga Veng CC ngamtu Kulikawn an champion

Mizoram cricket inelnaa sum tamna ber Mapuia Cricket League champion chu Kulikawn Cricket Club an ni. Suaka Cricket Ground-a inkhelah ruah a sur avangin DLS (Duckworth-Lewis-Stern) method hman a ni a, Chhinga Veng tan vanduaina thlentu a nih laiin Kulikawn tan erawh champion nomawi chawi tura kalkawng hawntu a ni thung.

Chhinga Vengin Kulikawn anga a zawna MCL champion nih an tumna a thamral a, Kulikawnin a vawi thum nan nomawi an chawi. MCL-ah an champion ang zat champion thei an la awm lo.

Inrinnia final inkhelah Kulikawn chu ṭhumvawrah an chak a, khua a ṭhat loh avangin captain Michael Lalremkima'n vawm hmasak thlangin thutlukna fing tak a siam. Chhinga Veng tan Samik Amal Das (43) a che ṭha a, Silchar tlangval all rounder thlawp ṭha ber K. Vanlalruata'n run 19 chiah a vaw chhuak. 

Over 19.2-ah Kulikawn-in 3C an vawm hlum vek a, champion lai Chhinga Veng hian run 95 chiah an siam. Hei bakah hian 3C bat laia pitch chhunga tlan lut Kulikawn player Raihan Jomeel vangin run nga pek belh an ni a, a vaia an run hlawhchhuah chu 100 a ni. Kulikawn bowler Parvez Ahmed chuan run 8 chiah pekin wicket li a la a, a che ṭha takzet.

Kulikawn-in over 7.1 an bat thlenin run 37 an siam hman a, wicket khat an hloh - mahse hetihlai tak hian ruahsurin inkhel a tibuai. Kulikawnin chak tura an mamawh zat chu run 65 a ni a, ball 77 hmachhawn tur an la nei bawk - team pahnihin chak turin chance an la nei ve ve.

Ruah sur vangin chawhnu dar 2:30 thleng nghah a ni a, loh theih loin DL method hman a ngai. Kulikawn target chu ball 17 aṭangin run 12-ah siamrem a ni a, Chhinga Vengin wicket thum an lak chuan hnehna chang thei bawk mah se Kulikawn dinhmun a ṭha ta zawk.

Kulikawn hian ball hnuhnung berah target tuk sak hi an umpha a, chak tura wicket thum lak ngai Chhinga Vengin wicket hnih an lak hman bawk avangin DL Method hman hnuah pawh champion kalkawng hi a awlsam lo.

Tun season Mahuma Memorial Cricket Tournament-ah Kulikawn hian final an lut tawh a, mahse Zarkawt Lords ngam loin ui tak chungin nomawi an thlir liam. MCL ṭan hmain player ṭha an kawl sa nual chungin auction-ah sum an seng hnem (Rs. 41,000) ber a, nomawi chawi tuma an inbuatsaihna thlirin champion an phu.

Kulikawn-in nomawi an chawi theih nan captain Michael Lalremkima thiamna leh tawnhriat a ṭangkai a, match ruk an khelh aṭanga run 119 siamtu Raihan Jomeel a pawimawh a, bowler ṭha K. Lalhmingmawia (10 wickets), Moses Ramhlunmawia (10) leh Rosiamliana Ralte Jr. (9) te an thawh hlawk bawk.

Kulikawn CC    bt    Chhinga Veng CC

*DL Method hmangin Kulikawn hi chak zawkah puan an ni.

Chhinga Veng CC - 100/10 (19.2)

Samik Das - 43 (49)

K. Vanlalruata - 19 (27)

Parvez Ahmed - 8/4 (3.2)

Michael Lalremkima - 15/2 (4)

Kulikawn CC - 37/1 (7.1)

Raihan Jomeel - 24 (31)

Abhay Joshi - 17 (15)

Samik Amal Das - 3/1 (1)

Lalnuntluanga - 13/1 (3)

Kulikawn CC - 12/2 (2.5 Overs)

*Ruahsur vangin DL Method hman a ni a, Kulikawn target chu run ball 17-ah run 12-a siam rem a ni a, Chhinga Veng tan wicket thum tuk a ni thung. 

Man Of the Series    Raj Kumar Thakur, Chhinga Veng CC 

Best Batsman    Samik Das, Chhinga Veng CC

Best Bowler    K. Lalhmingmawia, Kulikawn CC

Best Fielder    Parvez Ahmed, Kulikawn CC

Man of the Match (Final)    Parvez Ahmed, Kulikawn CC

Fair Play Award    Zarkawt Lords CC