Player pakua Spurs an tlawm

Son Heung-min leh Juan Foyth te hnawhchhuah an nih hnuah Tottenham chu Bournemouth lakah 1-0 in an tlawm a, goal awmchhun hi defender Nathan Ake-a'n extra time-a a tauh luh a ni.

Inrinni zan inkhelah Son chu midfielder Jefferson Lerma nen an intihbuaina lamah kut a thawh avangin minute 43-ah hnawhchhuah a ni a, second half minute thumnaah Juan Foyth chuan Jack Simpson a tih tluk avangin red card pek a ni bawk. Khel rorum tak Spurs midfielder Eric Dier-a'n hrem a tawk ve lo chu a vannei hle.

Premier League match hnuhnung palia vawi khat chiah hnehna chang thei Spurs hian point 70 hmuin pathumna dinhmun an la luah. Mahse, an hnuaia awm Chelsea-in nizanah hnehna an chang a nih chuan an pel dawn a, Arsenal pawh an chak a nih chuan an inkarah point khat chauh a awm dawn - match hnuhnung bera Everton hmachhawn tur Mauricio Pochettino naute dinhmun a ṭha tawk lo.

Tottenham manager Poch chuan, "Ajax leh Everton kan hmachhawn leh tur hi final anga pawimawh a ni. Engkim hi kan kuta awm a la ni a, kan tum ram kan thleng thei lo a nih chuan kan mawhphurh a ni ang," a ti. Argentine manager hian Ajax hneha Champions League final luh leh league table-ah a sang pali zinga tel theih a la inring hle.