Lewandowski chawl rei dawn

Robert Lewandowski chu a khup vei lam hliam enkawl a ngai a, chawlh kar li chhung vel chu a chawlh a ngai dawn - German champion Bayern Munich tan an striker hliam hi channa lian tak a ni ang.

Bayern hian Thawh-lehni zan khan Chelsea chu Champions League last 16-ah 3-0 in an hneh a, second leg khelh hmabak la nei mah se quarterfinal lut turin an dinhmun a ṭha tawh hle. Blues an hneh ṭuma goal khungtu Lewy hi second leg an khelh hunah chuan a inlan theih a rinawm ta lo.

Poland international hi Bundesliga lamah pawh Bayern innghahna a ni a, tun season league match 23 a khelh aṭangin goal 25 khung tawhin ani aia khung hnem an awm lo.

Bundesliga club lian dang RB Leipzig leh Borussia Dortmund ten Bayern league nomawi kawl lai an chuhpui mek a, match 11 khelh hmabak an la neihah pahnihna Leipzig aia an sanna chu point khat chauh a ni.

Striker rinrawl Lewy awm loh lai hian Hoffenheim, Augsburg, Union Berlin leh Eintracht Frankfurt te an hmachhawn dawn. April 4-a Borussia Dortmund nen an inkhelh hunah erawh a rawn kir hman tawh tura ngaih a ni thung.