Tualchhung tlangval Marquez a chak

MotoGP world champion Marc Marquez chuan 2019 Spanish MotoGP-ah hnehna a chang a, an rama a chak avang hian tun season rider championship hmahruaitu a ni nghal bawk.

Pathianni zan Jerez-a intlan-siakah Marquez hian pathumna aṭangin bul a ṭan a, mahse a tir lamah che fuh nghalin a hmaa awm Yamaha rider pahnih Fabio Quartararo leh Franco Morbidelli te chu a tlan pel nghal - kawng kawi hmasa ber aṭanga a tawp thlengin Honda rider hian hma a hruai tluan thei.

MotoGP huanga pole position chang thei naupang ber, kum 20 leh ni 14 mi Quartararo-a’n beiseina sang tak nei mah se inelna takah chuan a ruh a la no deuh a, lap 12 tlan hmabak an la neihah chesualin a tlan zui thei lo. Intlansiak hnuhnung zawk United States-a hnehna changtu Alex Rins chu pahnihnaah a thleng a, a hnungah Spanish rider dang Maverick Vinales a thleng ve bawk. 

SpanishGP an tlan ṭan hmaa championship hmahruaitu Andrea Dovizioso a tlan ṭha tawk lo a, lap 25 an tlan zawh hnuah palina niin hmahruaitu a nihna a hloh zui a, tawnhriat ngah Valentino Rossi chu parukna a ni. Hnehna changtu Marquez  chuan, “Austin-ah kan duh leh beisei angin thil a thleng lo a, tun ṭumah erawh ka duh ang thlapin bike ka khalh thei ta,” a ti. May 19 hian French Grand Prix an tlan leh ang.