Ajax tan treble a hnai zel

Treble champion nih beisei Ajax-in nomawi pahnih chiah an bak ta - Pathianni zan khan Dutch Cup champion ni turin Willem II chu 4-0 ngawtin an sawp.  

Ajax tan kum 35 mi Klaas-Jan Huntelaar chuan a la tar lo tih pholangin goal hnih a khung a, Real Madrid striker hlui hian tun season-a inelna hrang hrangah goal 22 a khung tawh. Season hmang ṭha tak Ajax tan Daley Blind leh Rasmus Nissen Kristensen te chuan goal khat ve ve an khung bawk a, 2009-10 season hnua a vawi khat nan Dutch Cup-ah Ajax an champion. 

Ajax hi  2013-14 season hnua league champion thei dinhmunah an ding mek bawk. Match hnih lek khelh tur awm tawhah PSV Eindhoven nen an point hmuh zat a inang a, goal difference an neih ṭhat zawk avangin table chung ber an luah mek. 

Dutch club hian Champions League lamah pawh 1994-95 hnua champion tumin kawng dik an zawh zel. Semifinal first leg-ah 1-0 in Tottenham Hotspur an hneh tawh a, Nilaini zanah second leg khel turin London club hi an mikhual leh ang.