IPL playoff khel tur a chiang

Sum tamna Indian Premier League playoff khel tur a chiang kim ta - Pathianni zan khan Mumbai Indians chuan wicket kuaa Kolkata Knight Riders hnehin qualifier 1 khel turin an dinhmun an tichiang a, KKR tan playoff beiseina a bo nghal bawk. 

Kolkata hian Mumbai Indians hi an hneh chuan playoff an lut ang a, MI-in playoff hmun tichiang tawh mah se top two pawn lamah season kharin eliminator an khelh a ngai bawk ang. Mahse, Kolkata aiin MI-in chak duhna thinlung an pu zawk - KKR hian over 20-ah run 133 chiah tlinin wicket sarih an hloh. 

Mumbai club-in over 16.1-ah wicket khat lek hloh chungin an target hi an umpha fel der a, Rohit Sharma (55 runs) leh Suryakumar Yadav (46) te a tawp thleng damin target hi an umphak pui. KKR-in hnehna an chan zawh loh avangin Sunrisers Hyderabad nen an point hmuh zat a in ang a, mahse Hyderabad club hi net run rate-ah an ṭhat zawk avangin playoff khel turin an tling. 

Pathianni zan inkhel hmasa zawkah Kings XI Punjab chuan wicket rukin Chennai Super Kings an hneh bawk a, MI an chak zui avangin CSK hian pahnihna dinhmun luah phah mah se qualifier 1 khel tura an dinhmun erawh a sawi danglam phak lo. 

Chennai club tan hian Faf du Plessis chuan run 97 ngawt siam mah se Kings XI tan KL Rahul (71) rawn che ṭha zuiin over 18-ah a team hi target a umphak pui a, wicket rukin hnehna an chang ta a ni. Zanin dar 7:30-ah Qualifier 1 hi khelh nghal tur a ni a, Mumbai Indians leh Chennai Super Kings an inhmachhawn ang a, a chak zawkin final an lut nghal ang.