Salah & Firmino tel lohna Reds tan beisei a bo?

Liverpool fan-ten nimin tlaiah an thil hriat chak loh ber pakhat an hria a, chu chu Mohamed Salah leh Roberto Firmino ten Barcelona an hmachhawn theih loh tur thu a ni. 

Premier League club hian zanin dar 12:30-ah Champions League semifinal second leg khel turin Barcelona an mikhual dawn a, Nou Camp-a 3-0 a an ngam loh hnu an ni. Final lut tura goal li khung mamawhtu Liverpool-in an tlarhmaa an chhuanvawr pahnih an chhawr thei dawn lo a, Anfield-ah inkhelh hamrik a rik hma hauhin beisei a bo. 

Liverpool boss Jurgen Klopp chuan, "Theihtawp kan chhuah ang a, hlawhtlin kan tum ang. Kan hlawhchham ta a nih pawhin fak tlak talin i bei ang u," tiin a naute a fuih a, an dinhmun a ṭha lo tih a hai lo. 

Liverpool-in an league match hnuhnung bera Newcastle United an hmachhawn ṭumin Firmino an chhawr thei tawh lo a, Barca laka an chhawr theih loh tur thu hi Klopp hian a hmain a tichiang tawh. Mahse, Magpies laka inhliam Salah dinhmun erawh a tirah a ṭhat thu a sawi a, "Engkim a ṭha vek," a ti. Nimina Klopp thusawi erawh a dang leh tawh a, Salah a inlan thei dawn lo. 

Klopp chuan, "A hliam neihna hi a lu a nih avangin fimkhur a ngai hle. Amah hi chuan harsatna a nei lo a, mahse damdawi lam thiamte thurawn kan zawm a ngai si," tiin medical team lamin Salah khelh an phal loh thu a sawi. 

Salah hian tun season-ah goal 26 a khung tawh a, goal 16 khung tawhtu Firmino leh Sadio Mane (24) te nen inhriatthiamna danglam bik tak an neih avangin Mane chauh a inlan thei tur hi goal mamawh Reds tan lunghnurna tham a ni. 

Klopp chuan, "Khawvela striker ṭha ber pawl pahnih kan chhawr thei dawn lo a, minute 90 chhunga goal li khung kan mamawh bawk. Mahse, khelmuala player 11 kan neih chhung chuan game ṭha tak khelh kan tum ang," a ti.

Premier League lamah pawh Liverpool hi Manchester City nen champion tuma inum mek an ni a, an league match hnuhnung berah pawh Newcastle lakah harsa takin 3-2 in an chak hram. 

Hetihlai hian Barcelona erawh La Liga-ah kar hmasa khan an champion daih tawh a, league match hnuhnung berah Celta Vigo ngam lo mah se player 11 ngawt an thlak danglam. Klopp chuan, "Ni ruk chhunga kan match thum khelhna tur a ni a, thutlukna siam tur tam tak kan nei. Barcelona chuan an league match hnuhnung berah khan player 11 an thlak danglam thei," tiin an dinhmun inthlauh thu a sawi. 

Nikum Champions League quarterfinal-ah khan Barcelona hian first leg-ah AS Roma chu 4-1 in an sawp a, second leg-ah erawh 3-0 a tlawmin Italian club an tlang daih!

Liverpool tan he result hi infuih phurna remchang tak a ni a, hetihlaia Roma goalkeeper Alisson an kawl bawk. Brazil international hian a tawnhriat aṭangin a ṭhiante a fuih phur thei ang. Klopp chuan, "Roma kha chuan away goal an nei a ni," tiin an goal khung loh pawi a tih thu a sawi a, "Beiseina kan nei. Mahse, thil tam tak sawi ka tum lo a, Barca tana phur belhchhahna siam ka tum lo," a ti!

Lionel Messi chungchang sawi nghalin, "Ani hi chu khawi hmunah pawh awm se dan a harsa ṭhin. Barcelona laka risk lak chu inhremna a ni a, fimkhur a ngai em em reng," tiin an hmachhawp hautak zia a hai lo. 

Klopp hi nimin khan Brazilian journalist pakhat chuan, "Eng nge thlak danglam i mamawh?" tiin a zawt a, "Result ka mamawh ber mai," tiin a chhang!

Mahse, Barca laka chak hi thil awlai a ni lo. German coach chuan, "Dik taka sawi chuan kawng tinrengin goal khung kha kan tum a, mahse Barca hneh tur chuan ṭhat famkim a ngai emaw tih mai tur a ni," tiin a harsat zia a sawi. 

Barca hian Javier Mascherano hunlai aṭang tawhin Liverpool duhlai an chhuhsak ṭhin a, nikuma Philippe Coutinho an lak khan 'Barca hian kum 2020 hmaa Reds player an lei leh a nih chuan a man pangngai bakah pound maktaduai 100 an pek belh ang' tiin inremna an ziak tel hial. 

Liverpool striker chhuanvawr ṭhin Luis Suarez-a'n Nou Camp-ah a club hlui laka a goal khung a lawm chiam a, Coutinho-a'n Manchester United an hnawhchhuah ṭumin, "Lawmna double a ni," tiin Reds fan a nih reng thu sawi bawk mah se Anfield-in player pahnih a lawm let dan tur hi hmuh châkawm zingah a tel.