Mittui nen Aaron Ramsey a liam ta

Aaron Ramsey chuan Pathianni zan khan Arsenal player a nih laia Emirates Stadium bika a hun hnuhnung ber a hmang a, season thara Juventus tana khel mai tur midfielder hian mittui nen North London club hi a thlah.

Wales international hian season 11 chhung a chamchilh tawh Gunners tana a contract neih lai chu tun season tawp rualin a hmang zo dawn a, July 1 aṭangin Italian champion Juve player a ni ang. Gunners player awm lai zinga senior ber Ramsey ang bawkin contract hmang zo striker Danny Welbeck a chhuak dawn a, keeper Petr Cech a chawl bawk ang.

Kum 28 mi Ramsey hi tun season an match hnuhnung ber thlenga inlan tura ngaih a ni. Mahse, Napoli nen Europa League semifinal an khelh ṭumin a inhliam a, a malpui hliam vangin a inlan dawn tawh lo. Pathianni zan Premier League-a Brighton nen an inkhelh zawh hnuah a player pui ten Ramsey, Cech leh Welbeck-te hi zahna chibai an buk!

Amah thlah tute hmaah Ramsey chuan, "Season 11 chhung hun ka hman tawhna chhuahsan ni tur a thlen chuan rilru a hnim duh ngei mai, he hmuna ka thil tawn hrang hrang ka ngaihtuah let a, thua sawichhuah vek sen chi pawh a ni lo.

"Naupang tak, kum 17 mi chauh nichungin ka rawn kal a, tunah chuan puitling nichungin ka chhuahsan dawn. Arsene Wenger-a'n he club ropui tak tana khelhna hmun min sialsak hi ka lawm a, ka theihnghilh tawh ngai lo ang," tiin a sawi a, fans thlawpna a hmuh ṭhat vanga a lawm thu a sawi bawk.

Arsenal tan Ramsey hian match 369 a khelh aṭangin goal 64 a khung a, a ṭhiante khung tur vawi 62 a siamsak bawk. FA Cup-ah vawi thum champion puiin, ṭum hnih chu chakna goal a khung - hlawhtlinna an chan theih nan mi pawimawh berte zinga mi a ni.

Hriatreng tura duh ber an zawhna chhangin Ramsey chuan, "2014 FA Cup final-a Hull laka chakna goal ka khung kha a ni ang," a ti. Season kua ngawt nomawi chawi loa an awm hnuah, extra time-a Ramsey goal hmanga hnehna changin Gunners hi an champion.

Kum 36 mi Cech-a'n season tawp rualin football khelh a chawlhsan dawn a, Czech Republic international hlui hi league-ah inlan tawh ngai lo mah se Europa League-ah chuan khelhtir ṭhin. Final an lut a nih a, an champion a nih chuan player a nih laia a match hnuhnung berah nomawi a chawi dawn tihna a ni.

Gunners keeper Cech chuan, "Emirates Stadium bika ka hun hnuhnung ber chu a ni ta der mai, season tluanin a sang pali zinga tel thei tura beiseina nei thei khawpin kan khel thei a, mahse a tawpah kan duh ang chu a thleng si lo, awm dan pawh thiam a har hle.

"Mahse, kan beiseina a la tawp lo. Europa League final khelhna tur Baku pan nan chawlhkar thum vel bak hun a awm tawh lo, Ningani zana semifinal second leg kan khelh tur atan nasa taka inbuatsaih nghal chu kan hna pawimawh a ni ang," a ti.

Chelsea player hlui chuan sawi chhunzawmin, "Arsenal elpui club aṭangin ka rawn kal a, mahse fans lamin min pawm thlap thei hi ka lawmna tizualtu a ni. Arsenal player-te hian hlawhtlinna chan kan phu a, final lut ila a hnuah nomawi hnuhnung ber chawi theih ngei ka duh," tiin Europa League nomawi chawi ngei a duh thu a sawi.