Arsenal mualah Tottenham an tlawm

Goal mawi danglam, penalty sawi hlawh, offside vanga goal pawm loh, mual sira manager lungawi lo insawh vel leh a boruak ti chiangtu player hnawh chhuah kan hmu - North London Derby boruak a la pangngai reng.

Dinhmun hniam zawka an din hnuah Arsenal chuan an mikhual Tottenham Hotspur 2-1 in an hneh a, hmelma club an hneh vanga an chak rual hian captain Pierre-Emerick Aubameyang inlan lo chuan sawi zui a hlawh.

Pathianni zan Premier League inkhelah Spurs tan Erik Lamela chuan 'rabona kick' hmangin a team hma a hruaipui. Mualneitu lamin Martin Odegaard leh Alexandre Lacazette te hmangin an chhang let.

Arsenal lamin ball chang hnem zawkin hun ṭha pawh an insiam thei, rawlthar duhawm Emile Smith Rowe-a'n hla deuh tak aṭanga goal bar a pet per dawp bak erawh hlauhawm taka chet an nei thei meuh lo.

Hliam vangin Son Heung-min lak chhuah a ngai a, South Korean forward awm lo tur hi Gunners tan lawmna tham a ni. Mahse, Son thlaktu Lamela-a'n minute 33-naah Thomas Partey leh Cedric Soares te ven karah thiam thil a 'show' zauh a, ball chang tlemin hma an hruai daih.

Jose Mourinho team lamin goal an neih avangin an venhim theih mai a rinawm. Soares-a'n goal ban a pet per dawp a, inkhel thununtu Mikel Arteta nauten chawlhlawk hmain an phu ang ngeiin goal an khung. Defender Kieran Tierney siamsak Odegaard chuan a khung.

Lacazette-a'n box chhunga a ball ṭha hmuh chu na takin goal lamah pet a tum a, a pet ṭhelh. Mahse defender Davinson Sanchez-a'n a lo tih buai avangin penalty a chawi a, Lyon striker hlui hian a khung - replay ennawn a nih hnuah erawh penalty pek loh theih ve tho niin a lang.

Lamela hun a thleng ve leh, a lawmawm loh zawngin a ni thung. Argentina international hi Tierney a nghawk avangin yellow card pahnihna pek niin an hnawt chhuak, card a hmuh hma hian ṭum hnih 'warning' a nih tawh avangin sawisel theih a nei lo.

Player tlem zawk Spurs an harhthar a, na takin an nawr let. Harry Kane-a tauh luh chu offside vanga pawm a ni lo; English striker hian freekick aṭangin goal ban a tih per dawp a, a per let chu Sanchez-a'n ṭha takin pet leh mah se Gabriel chuan a lo tauh chhuak.

Inkhel pawimawh an hmachawn hmain Arsenal team an inhmukhawm, he hunah hian captain Pierre-Emerick Aubameyang chu a tlai niin khawlhlang media ten an tarlang - a tlai vang hian Spurs laka bul ṭan tur kha bench lamah dah a ni!

Gunners manager Arteta chuan, "Inkhel bul ṭan tur a ni, mahse inkaihhruaina dan zawm loh vangin a khel lo, tih tur ruahman chu kan zavaiin kan ti mai tur a ni," tiin Auba chungchang a sawi a, thutlukna chu thil thleng thei hrang hrang ngaihtuah hnua tih a nih thu a sawi bawk.

Auba hian a match hnuhnung pasarihah goal ruk a khung, inkhel pawimawhah chuan inlan ngei tur a ni. Mahse, manager Arteta-a'n mimal aiin team a ngaipawimawh zawk, a hmun ruaka dah luh Lacazette-a'n a mawhphurhna a hlen ṭha hle.

Tottenham tan a sang pali zinga tel beiseina a la awm, a chak loh avang erawhin kawng a harsa hret dawn. Spurs manager Mourinho chuan, "Lamela goal kha ṭha tak a ni, mahse a pawimawh zawk chu inkhel result a ni a, kan chak chuang si lo.

"First half kan khel chhia, 1-1 ni mah se keini aiin an hriam zawk, player ṭhenkhat an khel ṭha tawk lo bawk. 2-1 a nih hnuah bei let viau mah ila a tlai tawh, a khaikhawm nan chuan VAR entu Michael Oliver leh Paul Tierney ten result an siam," a ti.

Portuguese manager hi VAR thutluknaah a lawm lo, penalty an chawi chu chawi loh tur niah a ngai. Arsenal manager Arteta erawhin penalty chungchangah sawi thui tur a neih loh thu a sawi ve thung.

Arsenal ṭantu tan chuan St Totteringham's Day hi hriat ngei a ṭul. Gunners ṭantuten an hmelma Tottenham Hotspur chunga an awm tih an nemngheh huna lawm ṭhin a ni a, ni bik a awm lo.

Arsene Wenger-a hunlai khan Arsenal-in kum 21 chhung a zawn zatin Spurs chungah an awm thei a, Gunners ṭantuten St Totteringham's Day chu ngaiah an nei chho. Amaherawhchu Arsenal ṭantuten an club dinhmun sanga dahtu an hnawl a, French manager an ban hnuah erawh Spurs hnuaiah an awm ta deuh ziah.

2015-16 season khan Arsenal-in pahnihna nichungin season an khar a, Tottenham chungah an awm. Amaherawhchu hemi zawh hnu hi chuan Spurs hnuaiah an awm ta char char a, St

Totteringham's Day an hmang ngai tawh lo. Pathianni zanah Mikael Arteta hoten Tottenham hneh mah se khelh zat inangah Gunners hian Jose Mourinho hote hi point liin an pha tawh lo.

Arsenal tan Europe-a khelh phak a harsa tawh dawn a, chutihrualin Spurs chunga season an khar thei a nih chuan Gunners ṭantute tan lawmna tur a awm ang.