Match hnih chak zawn tawh Mizoram Vawiinah Manipur hmachhawn dawn

India ram chhunga hmeichhe cricket inelna Women's Senior One Day Trophy khelh laiah Mizoram chuan an match hmasa pahnihah hnehna an chang a, vawiin chawhma dar 9:00 hian Manipur nen an inkhel leh ang.

Alur Cricket Stadium III, Bangalore a inelna neihah Mizoram hian an match hmasa berah Arunachal Pradesh chu wicket sarih in an hneh. Pathianni khan khel zui lehin Jammu and Kashmir chu run 27 in an hneh leh a ni.

Arunachal an hneh ṭum hian Julie Malsawmtluangi chuan ball 64 a hmachhawn aṭangin run 34 a siam a, a thi lo. J&K lakah PC Vansangzuali'n run 28 siamin, K. Lalrinawmi chuan run 22 a siam ve bawk.

Mizoram manager Raj Kumar Joshi chuan, "Match hnih khelh aṭanga hnehna chan ve ve hi a lawmawm, player-te thawhrimna a ni a, chutih rualin tualchhung lama zirtirna petu coach-te an fakawm. Hun rei lote chhungin hmeichhe team hian hma kan sawn hle," tiin Vanglaini a hrilh.

Hmabak thlir nghalin Raj Kumar chuan, "Manipur hian match hnih an khel tawh a, chak an la nei lo. Chutih rualin cricket chu hriatthiam a har, ball hnuhnung ber thlengin fimkhur a ngai hle a ni," a ti.

Mizoram hi plate group-ah Manipur, J&K, Arunachal Pradesh, Bihar, Puducherry leh Sikkim te nen an awm. An inkhel kual vek dawn a, chumi hnuah a sang berin knock out stage an lut ang.