Man City tan a harsa tawh lo

Manchester City-in zanin dar 1:30 hian Puskas Arena, Budapest-ah Borussia Monchengladbach an hmachhawn dawn a, Pep Guardiola hote hian Champions League last 16 first leg-ah 2-0 a an hneh tawh avangin an dinhmun a ṭha hle.

Puskas Arena-ah tho hian first leg khelh a ni a, Bernardo Silva leh Gabriel Jesus te goal hmangin Man City-in hnehna an chang. Neutral ground-ah ṭum hnih khelh ni mah se away goal rule hman a ni dawn tho. An intawn hmasak zawk hi Glabach 'home' match anga chhiar tur a nih avangin English club-in away goal an nei sa a, an dinhmun ṭha sa a ṭhat belh ang.

Pep Guardiola hote hian kartawp khan Fulham 3-0 in an sawp a, player pawimawh hahchawlhtir an ni. City goal nawrna ber pakhat Raheem Sterling chu squad-ah an awm lo a, Kevin De Bruyne, Ilkay Gundogan, Riyad Mahrez, Kyle Walker leh Phil Foden te chhawr loh zingah an tel.

Man City-in Champions League nomawi an la chawi ngai lo a, Spanish manager Pep pawhin Barcelona a chhuahsan hnuah Champions League nomawi a la chawi leh loh avangin Europe inelna sang ber hi a ngai pawimawh hle.

Premier League champion nomawi chawi mai tur Man City tan UCL quarterfinal thlen hi harsa tawh loah a ngaih theih a, an khingpui tur Glabach hian inelna hrang hrangah match riat chhung chak hmel an hmu tawh lo. 

Marco Rose-a hote hi a zawnin vawi ruk an chak tawh lo a, Man City laka an tho chhuak thei lo a nih pawhin mualpho lutuk loa Champions League mangṭha an duh ang.