Manchester United chakna 'Own Goal'

Manchester United-in Pathianni zan khan an mikhual West Ham United chu 1-0 in an hneh a, goal awmchhun hi Hammers defender Craig Dawson-a'n an lama a tihluh a ni.

Ole Gunnar Solskjaer-a hoten point thum an hlawh chhuah avangin point 57 hmuin pahnihnaah an awm a, season thara Champions League khel turin beisei an nei sang zel.

Edinson Cavani leh Anthony Martial te tel loa khel Manchester United-in inkhel thunun mah se goal khung erawh an harsat. Manchester derby-a inhliam Marcus Rashford-a'n dinglam aṭanga Mason Greenwood-a cross duhthusam chu goal zawnah a tauh thei lo.

Kum 19 mi Greenwood hi goal hmaah a vannei lo, minute 36-naah a ball pet ṭha zet chu keeper Lukasz Fabianski-a'n a dan hnuin goal ban a per a, goal pawn lamah a kal. 

First half-ah goal a lut lo a, second half-ah United goal bawh a na chhunzawm. Greenwood-a cross ṭha chu defender Dawson-a'n a pet out hman. Minute 53-naah goal a lut ta a,

Fernandes-a corner pet chu Scott McTominay-a'n a tauh thawi hnuah Dawson-a'n a lamah a tilut.

Goal dang hmuh tur a awm chhunzawm lo a, United erawhin chance ṭha ṭum hnih an nei. Box pawn aṭanga Fernandes-a ball pet chu keeper Fabianski-a'n a dang hman. Greenwood-a vanneih zan a ni lo a, Engish forward hian kawh zetin goal ban a pet per bawk.

David Moyes-a hnuaia season hmang ṭha tak West Ham-in Jesse Lingard tel loin an result ṭha an chhunzawm thei lo. Scottish manager hian Old Trafford-a mikhual team a enkawl ṭumin chak hmel a la hmu lo a, vawi 15 inelna a hmachhawn tawhah vawi 11 zet a chak lo.

Chutihrualin Hammers erawh table-ah panganaah an la awm pha a, palinaa awm Chelsea point thum chauha an phak loh bakah match khatin an khel tlem. Moyes-a hote tan season thara Europe khelh theihna kawng a la inhawng zel.

Manchester United erawh February thlaa an chet ṭhat loh avangin nomawi beiseina a thamral tawhah a ngaih theih a, chutihrualin Europa League leh FA Cup-ah beisei tur a la awm.

Solskjaer-a hote hian March 18, Ningani zan dar 1:30-ah AC Milan nen Europa League last 16 second leg an khel dawn a. March 21, Pathianni zan dar 10:30-ah Leicester City nen FA Cup quarterfinal an khel leh bawk ang.