Foxes lakah Sheffield an mualpho

Sheffield United-in an manager Chris Wilder an ban hnua an match hmasa berah Leicester City 5-0 in an hneh lo. Pathianni zana King Power Stadium-a inkhelah hian Kelechi Iheanacho-a'n hattrick a siam a, Ayoze Perez-a'n goal khat a khung bakah  Ethan Ampadu-a'n an lamah a ti lut bawk.

Blades hian tun season-ah beisei an pha lo a, match 29 an khelh aṭangin point 14 chauh an hmuh avangin an relegate ngei a rinawm tawh. Chutihrualin season liam taa pakuana nihpuitu Wilder awm lohin nghawng lian tak a nei bawk. English manager Wilder-a hnuaiah hian Sheffield-in inelna hrang hrangah match 227 an khel a, ṭum khat chiah goal nga an chhuah. Chu chauh ni loin goal thuma chak loh an nei ngai lo.

Amaherawhchu Wilder-a tel loa an inkhelh hmasak berah erawh goal nga an chhuah hi an vannei zawk a, hattrick siamtu Iheanacho-a'n hnai tak aṭanga a pet over bakah Foxes tlarhmaten chance ṭha an hlah hnem hle. Kum 35 mi Blades captain Billy Sharp chuan, "Kan khelh dan kha ngaihdam theih a ni lo. Kan khelh chhiat em avangin tute tan pawh a zahthlak. Kan fimkhur lo a nih chuan tuna kan dinhmun hi thleng nawn thei a ni," tiin an khelh danah a lungawi loh thu a sawi.

Foxes erawh season liam taa palina an nih phak loh hnuah season tharah Champions League khelh ngei an tum ruh hle. Brendan Rogers-a hote hian team ṭha an ni tih an pholang a; Premier League 'big six' ah chhiar tel ni lo mah se tun hnaia an khelh danah erawh a ṭha paruk zingah an tel chiang a ni.

Leicester boss Brendan Rodgers chuan, "Kan khingpui tan khan chance kan siam lo. Ball kan chan khan kan dawhthei a, hun duh hret mah ila tlarhnung kan tawn pawh hnuah erawh goal hmaah kan hlauhawm hle a ni," tiin an khelh danah a lungawi hle.