Pele khumtu Cristiano Ronaldo

Cristiano Ronaldo chuan goal khung hnem lamah 'King of Football' tia an sawi Pele a khum ta! Portugal captain hian Cagliari lakah hattrick siamin Juventus chu 3-1 in hnehna an chanpui - Serie A nomawi hum an beiseina a nung zel.

Ronaldo hian inkhel tir lam minute 32 chhungin goal thum a khung hman a, official match bikah goal 770 a khung tling chiah; goal 767 khungtu Pele chuan Old Lady star hi a lawmpui thu instagram lamah a tarlang.

Media ṭhenkhat chuan Ronaldo hi goal khung hnem ber angin a ziak. Mahse, Czech Football Association chuan an legend Josef Bican khan goal 821 a khung niin an sawi ve thung, he thawnthu leh inhnialna hi chu tawp thei lo tur a ni.

Rec.Sport.Soccer Statistics Foundation (RSSSF) tarlan dan chuan Bican-a'n goal 805 a khung a, heng zinga 27 chu reserve team leh official match ni lem loa a khung niin an sawi, official goal chu 759 niin an chhinchhiahsak - Ronaldo leh Pele aiin a tlem.

Pele-a'n a instagram lamah a goal khung zawng zawng zat chu 1,283 a nih thu a tarlang a, mahse official match tel lo a ni. Khawvela goal khung hnem ber a nih thu a ziak bawk, official match bikah erawh Ronaldo a tluk loh thu a pawm ta.

Brazilian legend chuan, "Mitin hian kawng zawh lam kan nei vek, zin kawng duhawm tak i zawh hi ka lawmpui a che. I inkhel lai hi hmuhnawm ka ti a, mitin hian en nuam an ti vek, ka ngaisang takzet che. Official match bika ka goal khung zat i rawn khum hi ka lawmpui che," a ti.

Lawmpuina a dawn chhang letin Ronaldo chuan, "Madeira aṭanga seilian naupang tan chuan Pele goal khung zat khum hi suangtuah phak baka sang a ni. Professional career-ah goal 770 ka khung tling ta," a ti. Real Madrid forward hian Pepe chu mitin ngaihsan a nih thu a sawi bawk.

Porto hneh loin Champions League aṭangin an tla a, sawiselna kara an len laiin Juventus an tho chhuak. Ronaldo thiam dan a la danglam lo a, season kal laiah league goal 23 khung tling tawhin ani aia khung hnem an awm lo.

Andrea Pirlo naute tan erawh hmabak a hautak deuh tawh dawn. Serie A lama an elpui Inter Milan chuan Romelu Lukaku leh Lautaro Martinez te goal hmangin Torino 2-1 in an hneh; Inter hian point sawmin hma an hruai fal - Juve lamin match khatin an khel thlem thung.

Champion beisei zinga mi AC Milan erawh an mikhual Napoli lakah 1-0 in an tlawm, pahnihna dinhmun la luah mah se pathumna Juve aia an sanna chu point khat chauh a ni. Milan tan nomawi beiseina la bo lo mah se Inter umphak a harsa tawh dawn.