Real-in Atalanta mikhual dawn

Champions League quarterfinal lut turin Real Madrid tan hmabak pakhat chiah a awm ta - last 16 first leg-a 1-0 a an hneh hnu Atalanta chu zanin dar 1:30 hian an mikhual dawn. 

Real hi La Liga lama Elche laka chak hlim, champion beiseina nei thar mek an nih avangin an phur vanglai tak a ni a, hmachhawn an châkawm dawn lo. 

Chutihrual chuan Real laka an tlawm hnuah Atalanta-in league match ngaah goal 10 ngawt an khung leh tawh a, si khat phur sain zin dawn mah se Real laka chak inbeisei chungin an zin ang. 

Real tan Elche laka a inlan loh hnuin Marcelo chuan club training a zawm leh tawh a, hetihlai hian Alvaro Odriozola, Mariano Diaz leh Dani Carvajal-te erawh an la inlan thei dawn lo thung. 

Elche laka bench-a dah an nih avangin Luka Modric leh Toni Kroos-ten Atalanta-ah bul an ṭan ang tih a chiang a, hetihrual hian Casemiro chu hrem vanga a inlan theih dawn loh avangin  Federico Valverde chuan Modric leh Kroos hi a kawppui ang. 

Sergio Ramos-a'n Elche lakah bul a ṭan leh tawh avangin Atalanta lo mikhual zingah tel tura beisei a ni a, Eden Hazard erawh bench-ah bawk a awm leh phawt a rinawm. 

Cristiano Ronaldo-a'n kum 2018-a Real Madrid-a chhuahsan hnuah Karim Benzema chu Real goal khung khawl a ni a, Ronaldo chhuah hnuah Madrid khaw club tan hian goal 77 ngawt a khung tawh. 

Benzema hian Ronaldo chhuah season, 2018-19 khan match 53-ah goal 30-a khung a, season hmasa khan match 48-ah goal 27-a khung bawk. 

Kum 33 mi striker hian tun season-ah match 30 khela goal 20 khungin assist vawi nga a nei leh tawh a, zaninah Atalanta tan ven bik tur a ni leh dawn. 

Italian club hian tun season-a goal 19 khung tawh Luis Muriel leh Duvan Zapata (13 goals) an nei ve tho tih hriat tel a ṭha a, goal khat neih sa avanga ngaihngam taka an awm a nih chuan Real-in an tisual ang. 

Wing back Robin Gosens hi lam hmaih thiang lo a ni a, tun season match 31-a khelh aṭanga goal 10 khung tawh hi Atalanta goal nawr kawngah player ṭangkai a ni.

Atalanta tan right back Hans Hateboer chu hliam vangin a inlan thei dawn lo a, midfielder Remo Freuler chu first leg-a a red card vangin a inlan thei lo bawk ang.