IBA title fight tur 'Zo Keite' NT-a

Mizo boxer lar NT Lalbiakkima'n title fight a neih hun tur a chiang ta a, April 18 khian Punjab boxer ṭha Sandeep Singh nen International Boxing Association intercontinental title an inchuh dawn. 

NT-a leh Sandeep-te inhnekna tur hmun hi Seawoods Grand Central Mall, Mumbai-ah a ni a, Siaha boxer inlanna tur hi minimum weight-ah a ni ang. 

December-a a professional fight hmasa bera minute khat leh second 25 chhunga hnehna chang thei NT-a chuan, "World ranking-ah 141-na chauh ka la nih avangin world title fight nghal theih a la ni lo a, intercontinental title ka chuh phawt ang. 

"Intercontinental title ka chuh theih chhan pawh hi amateur lama ka record ṭhat vang a ni a, IBA lamin uluk taka ka profile lo enin duhsak takin min pawm a ni," tiin Vanglaini a hrilh. 

NT-a hian IBA intercontinental title hi a hlawh chhuak thei a nih chuan fight vawi li vel tal a hmachhawn leh ang a, chumi hnuah a ranking-in hma a sawn a nih chuan world title a beisei thei ang. 

June 8, 2018 khan NT-a hian world number one leh Olympic champion Hasanboy Dusmatov chu President's Cup-ah a hneh a, Indian boxer zinga world number 1 hneh thei hmasa ber a nih avangin IBA lam pawhin intercontinental title fight nei tur hian an duhsakna an lantir a ni. 

Marine Pro Boxing Promotions hnuaia awm NT-a hian NTP Boxing Hall, Bawngkawnah rim takin training a nei mek a, a coach hi Lalmuanpuia niin strength coach Lalbiakzuala Khenglawt leh Ramnghahthianghlima Ralte-te an ni bawk.