Ajax treble kalkawng dal thei tur Spurs

Kum nga hnua a vawi khat nan Ajax-in nomawi an chawi ve leh ta a, Pathianni zan khan Willem II chu 4-0 a sawpin Dutch Cup-ah an champion. 

Nomawiin rei tak a hel hnuah champion vangin Ajax an lam ve leh ta a, mahse pakhatah an lungawi lo. Dutch Cup chawi chungin coach Erik ten Hag chuan, "Season duhawm tak kan hmang a, mahse kan lawm a la kim lo," a ti. 

Ni e, he Dutch club hi league leh Champions League nomawi chawi thei dinhmunah an la ding mek a, club tlemte chauhin an la tih theih treble champion ni thei dinhmunah an ding mek. 

Ajax hian zanin dar 12:30 hian Champions League semifinal second leg khel turin Tottenham Hotspur an mikhual dawn a, 1-0 a khualmualah an chak tawh avangin London club aiin an dinhmun a ṭha zawk. 

Champions League semifinal khel tura Ajax zinkawng a ngaihnawm takzet a, champion lai Real Madrid leh Cristiano Ronaldo neitu Juventus te hnawt chhuaktu an nih avangin dah san loh theih an ni lo. 

Ajax coach Erik ten Hag chuan, "Zinkawng hlimawm tak kan zawh chho a, kan tawnhriat tam tak kha chu hriatreng tawh tur an ni. Real Madrid kan hnehte kha engtikahmah kan theihnghilh tawh lo ang. "Mahse, thil tak tak thlir chuan 'hei hi kan thawnthu chu a ni' tichunga kan kut ngeia kan khawih theih tur thil kan mamawh a, chu chu nomawi a ni. Dutch Cup kan nei tawh a, a bak kan la duh," a ti!

Kum 49 mi Ajax coach hi Pep Guardiola ngaisangtu a ni a, an team khelhtir dan pawh khaikhin a hlawh ṭhin - Pep-a'n Bayern a enkawl kum hmasa pahnihah khan Bayern B team a enkawl a, tunah chuan treble champion nih hial a sawi ri ta. 

Tottenham-in first leg-a Ajax an ngam loh hnuah an insiamṭha lo. Premier League-ah Bournemouth an hmachhawn zui a, hneh ngei tura ngaih team lakah 1-0 in an tlawm. 

London club hi an match hnuhnung pangaah vawi li an tlawm a, vawi khat chiah an chak! Dutch club lakah si an phurh sa bawk avangin comeback tur chuan insiamṭhat an ngai hle tihna a ni. 

Spurs manager Mauricio Pochettino chuan, "Kan hmaah final-in min hmuak a, season tawpa kan awmna tur chu kan kuta innghat a ni," a ti a, an khelh ṭhat phawt chuan engkim an la thlak danglam theih thu a sawi. London club beiseina siamsak turin Ajax hian Champions League-ah home record an nei ṭha lo - Bayern Munich, Juventus leh Real Madrid an mikhualah hnehna an chang zo lo vek. Spurs tan beisei tur a awm tihna a ni.