Kvitova a chak hram

Madrid Open hmeichhe singles champion lai Petra Kvitova chuan a match vawi hnihnaah fiahna a hmachhawn nghal. Czech Republic nula hian Kristina Mladenovic chu 6-3, 7-6 (7/5) a hnehin third round a paltlang hram.

Thawhṭanni zan inkhelah Kvitova-i'n vawi sarih aces a siam a, a service vawi hnih hloh mah se a khingpui service vawi thum a chhuhsak theih avangin a vannei zawk - Mladenovic nen an intawn hnuhnung vawi ngaah hnehna a chang vek.

Seeded pahnihna Kvitova chuan, "Hmun danga kan inkhelhna ṭhin clay court aiin ball kal dan a danglam deuh a, inkhelh a harsa takzet a ni," a ti. Madrid-ah hian a vawi li nan champion a tum mek. Inkhel dangah Sloane Stephens chuan world number one hlui Victoria Azarenka chu 6-4, 2-6, 6-2 in a hneh. Belarus nula hian double faults vawi kua ngawt a neih chu American player a hneh loh chhan langsar tak a ni. Seeded pasarihna Kiki Bertens chuan 2017 Roland Garros champion Jelena Ostapenko lakah aces vawi 11 siam chungin 6-4, 6-3 in hnehna a chang ve bawk.

Mipa singles lamah first round khelh a ni a, tun hnaia match nga chhung chak ni hmel hmu tawh lo Karen Khachanov chuan Spanish player Jaume Munar 6-4, 6-7 (5/7), 6-3 in an hneh. March thlaa khelh zawh tak Indian Wells hnuah chak ni hmel a hmu ve leh ta chiah a ni.

German tlangval Philipp Kohlschreiber-a'n Mikhail Kukushkin 6-2, 7-6 (7/5) in a hneh a, Frances Tiafoe pawhin Nikolaz Basilashvili chu 6-7 (8/10), 6-3, 6-4 in a hneh bawk. Madrid Open vawi nga champion tawh Rafael Nadal chu thuthar thehdarhtute a hmachawn laiin a pum na vangin a chhuak a, world number 2 hi vawiina inlan tur niin he thu buatsaih a nih lai hian a inkhel thei dawn em tih a chiang lo.