Tiger Woods tan chawimawina sang

United States mipui vantlang tana chawimawina sang ber Presidential Medal of Freedom chu US president Donald Trump-a'n golf khel thiam hmingthang Tiger Woods hnenah a hlan.

Thawhṭanni zan khan White House Rose Garden, Washington-ah hlanna hi neih a ni a, President Trump chuan, "Khawvel puma America ṭhat bikna ti langtu a ni," tiin Woods a dah sang thiam hle.

Kum 43 mi Woods hian a hun hmasa lamah hlawhtling takin golf khel thei mah se, hliam a neih hnuah ngai a awh leh mai thei lo. Mimal nunah harsatna hrang hrang a tawk bawk a, kum 11 zet nomawi chawi loa a awm hnuah kumin April thla khan a major title 15-na ni turin Augusta-ah hlawhtlinna a chang leh a ni.

Woods chuan, "Kum 1997 khan ka nomawi lian hmasa ber ka chawi a, khatih hunlai kha chuan ka nu leh pa an la awm. Tunah chuan ka pa a awm tawh lo a, ka nu erawh ka kiangah a la awm. Infiamna huang chhunga hlawhtlinna ka chan hnuah hetiang chawimawina ropui ka dawng leh tluka lawmna tur dang hi a awm chuang lo ang," a ti.

Golfer zingah Woods hma hian Jack Nicklaus, Arnold Palmer leh Charlie Sifford ten chawimawina hi a an lo dawng tawh a, Sifford bik hi mihang zinga PGA Tour player ni thei hmasa ber a ni.