Chanmari West tan semifinal kawng a inhawng

Thawhṭanni zan Suzuki Gixxer Pro Volleyball League inkhelah Chanmari West chuan Tuichangral 11-15, 16-14, 15-4, 15-12, 15-12 (4-1) in an hneh a, tualchhung volleyball inelna sang berah hian semifinal lut turin beiseina an neih chu an chhawmnung zel.

Chanmari West hian zaninah an chunga awm Chhinga Veng Spikers an hmachhawn zui leh nghal dawn a, set lak hnem a pawimawh ang. West Warriors hi tun dinhmunah palina an ni a, an hnuaia awm Tuichangral nen an point neih zat a inan avangin league match hnuhnung ber hian an dinhmun tur a tichiang dawn a ni.

Chawnpui Sports Centre-a inkhelah Tuichangral lamin bul ṭan fuh zawkin harsa lutuk loin set khatna chu an la nghal mai a, season hmasa ang bawkin Aizawl khaw pawn aṭanga PVL khel awmchhun team hian semifinal luh leh ngei an beiseina a sang hman hle.

Mahse, set hnihna aṭangin Chanmari West lamin thapui an thawh a, point 30 ngawt hlawh chhuaktu Abhimanyu Ray chu RS Traders Player of the Night ni thei khawpin a rawn khel chhuak a, Railways player hian Thutak Nunpuitu Team lakah a club hi hnehna a lo chanpui tawh bawk.

Chanmari West tan tual­chhung player zingah Ray-a point neih zat el phak an awm lo. David Lalremruata'n point sarih hmuin Lalruatpuia leh Malsawmtluanga te chuan point li ve ve an hlawh a, an pathum hian vawi hnih ṭheuh tihsual an nei thung - an mahmawh hnehna chang tura state pawn player an thlawp danah erawh fak an phu.

Season hmasa finalist Tui­chang­ral lamin an hma­chhuan Jaideep Sandu-a'n point 23 nei thei mah se, a tihsual vangin point 12 ngawt an khingpuite an pe thung a, an khingpui lam ball vuak a dan ṭhat tawk loh bawk avangin tun PVL bika a vawi thum nan an tlawm.

Tuichangral hian Nilaini zan hian an league match hnuhnung ber atan Chhinga Veng Spikers an hmachhawn dawn. Spikers hi match li an khelh tawh china hnehna la chang fai vek an nih avangin hmachhawn an awlsam dawn lo.

Khawpui pawn team-in Chanmari West lakah point 10 nei chungin bul ṭan mah se set khat chauh an lak belh theih avangin match nga aṭangin point 11 an nei a, table-ah pangana dinhmun an luah. West Warriors nen an point inang mah se an pahnih inkhelha chak lo zawk an nih avangin a hniam zawkah an awm.

Tualchhung volley­ball inel­na sang berah hian kuminah a vawi khat nan junior leh hmeichhe team inelna buatsaih tel a ni a, senior team inlan hma hian kum 18 hnuai lam ten inelna an nei hmasa ṭhin.

Senior team pasarih te hi league round hmangin an inel hmasa a, an inkhelh kual hnuah a sang paliten semifinal an khel ang. Match tinah hian set nga an khel tling zel a, an set lak zat hi an point hmuh zel a nih avangin match tin a pawimawh em em vek.