Reliance Academy-ah Mizo 4 an tling

Mizo naupang pariatin Reliance Academy-a awm turin Mumbai-ah May 2-6 inkar khan trial an nei a, mi pali Lal­muan­puia, Emmanuel Rem­lalfakzuala, Rosang­puia leh Ramdinpuia te an tling.

Final Trial hmachawn tur hian India ram pum aṭangin naupang 56 thlan­chhuah an ni a, academy a awm tur hian mi 15 lak niin Mizo pali zet an thlang. Reliance hian final trial hmachhawnte hi an kal leh hawna senso bakah an thlenna zawng zawng an buaipui vek. Tun ṭuma tling palite pawh hi an chhungte pahnih ṭheuhin an hruai dawn a, kalna leh thlenna senso hi Reliance-in an tum vek ang.

Tun ṭuma an thlante hi kum 2007-a piang an ni a, Reliance Academy-ah hian an zirna zawng zawng an buaipui dawn a, pawl 12 an pass thleng an awm ang. Mizo naupangte hi Van­lalrova'n a hruai. Rova hi Jerry Zirsanga leh Malsawma te nen Tata Football Academy aṭang­a inzir chhuak an ni a, Mizo Trio tiin an lar ṭhin hle. Tun­ah erawh Rova hi coach a ni tawh a, MPL club Luang­mual FC leh Zo United te a enkawl tawh a ni.