Captain Kompany-a'n goal ropui a khung Match khat khelh hmabakah Man City 1-na

Premier League champion lai Manchester City-in Thawhṭanni zan khan captain Vincent Kompany goal ropui hmangin Leicester City 1-0 in an hneh a, nomawi chawi nawn turin Brighton & Hove Albion hneh chiah an mamawh tawh.

Pep Guardiola hote hian match 37-ah point 95 an hmu a, anmahni hnaih bertu Liverpool aiin point khat chiahin an hmu tam. League match hnuhnung ber hi Pathianni zan dar 7:30-ah khelh tur a ni a, hemi hunah chiah hian champion tur a chiang dawn.

Vincent Kompany hian Manchester City-ah a vanglai hun zawng zawng a hmang. Belgian defender hian kum 22 mi niin 2008 khan English club hi a zawm a, hetihlai hian Citizen hi Premier League club vantlang chauh an la ni.

Pep-a awm hmaa Man City-in league nomawi ṭum hnih an chawi ṭumin Kompany hi player pawimawh a ni a, nikumah erawh inhliam vangin a khel tam lo - squad tikimtu chauhah a ngaih theih. 

Chutihrualin Kompany hi tawnhriat nei ṭha leh theihna nei sang a nih avangin match pawimawhah a danglam ṭhin a, nikuma League Cup an chawi ṭum pawhin final-ah man of the match atan an thlang. Kum 33 mi a nih tawh avangin tun season-ah pawh Kompany hi rinrawl a ni lo. Foxes nen inkhelh ṭuma a bul ṭan hi league bika vawi 12 bul a ṭanna chauh a ni a, bench aṭanga a luh chhiar tel pawhin vawi 16 a tling pha chauh.

Amaherawhchu a hun takah Kompany a rawn rah a, tun season-a goal la khung lo, assist pawh la nei lo, chance ṭha pawh la siam lo hian champion-na goal ang hial a sawi theih goal ropui chu yard 25 aṭangin Leicester City lamah a khung. Citizen captain hian box pawn aṭangin mar ṭha zetin a pet a, Leicester keeper Kasper Schmeichel tan dan rual a ni lo.

Man City boss Pep Guardiola chuan, "Kei chuan, pet suh, Vinny pet suh tiin ka a au," tiin goal luh hmaa thil thlen dan inkhelh banah a sawi. Spanish manager chuan, "Goal khung turin amahah rinna sang tak nei lo mah ila thutlukna ṭha tak a siam. Football hi chu hriatthiam a har ṭhin. A pawimawh ber lai chu goal khung turin inrintawkna a nei a, a rinna nasa tak avangin hnehna kan chang a ni," tiin rinna tak tak neih a pawimawh thu a sawi lang.

Guardiola chauh ni loin Sergio Aguero leh Raheem Sterling-te pawhin an captain hian goal a khung theih an ring lo. Inkhelh ban chiahah Aguero pawhin, "Vinny, pet lo turin ka hrilh lawm lawm che kha," tiin nui chungin a hrilh. Sterling-a'n twitter lamah Kompany ball pet lai dahin caption-ah, "Ka hmel aṭang khian, "Vinny ti suh. Ti nge i pet?' tih a lang. Captain incredible, i pet ṭha takzet," tiin a dah ve bawk.

Amaherawhchu Vincent Kompany hian pet goal theih a inring tlat. Chutihrualin tun ṭum hi kum 2013 hnua box pawn aṭanga goal zawna a pet hmasak ber a nih avangin vanneih a tel a, champion zia tih pawhin a sawi theih bawk.

Amah ring lotute chhangletin Kompany chuan, "Mi zawng zawng khan pet lo turin min duh a, minti hrilhhai a, min tithinur lek lek zawk a ni. Hei leh chen hi ka lo inkhel tawh a, training-naah pawh ka khung fo tawh. Kum naupang zawk leh midfielder-ten goal-a pet leh pet loh turah thutlukna min siam sak tur ka ni lo," tiin a inringtawk hle.

Manchester City-in minute 70-naah goal an khung chauh a, hemi hma zawng hian hlauthawngin an awm. Liverpool manager hlui Brendan Rodgers chuan tlarhnung a rem phui ṭha a, passing game an khel ngamin goal chance an insiam tel bawk. Rodgers hian kum 2014-a Reds a enkawl laiin nomawi chu ban phak thuak tawh hnuah an thlauh leh a, tun ṭumah hian a club hlui tan a theihna zawng zawng seng mah se a hlawhtling lo.

Leicester hian nuam sain Man City an awmtir lo a, hun tawp lamah Foxes forward Kelechi Iheanacho-a'n siphurh sut theihna hun ṭha a hlah. Nigerian forward hian khung ngat se chuan Liverpool hian 1990 hnua a vawi khat nan league nomawi an chawi ngei a rinawm.

Chutihrualin Reds tan Foxes player-te dem theih a ni lo a, keeper Kasper Schmeichel aṭanga tlarhma thlengin an khel ṭha. Dane keeper hian Sergio Aguero goal khung tur a dan sak a, ball-in goalline a pelh lohna hi centimetre tam a ni lo. 

Leicester boss Brendan Rodgers chuan, "City hi Europe-a team ṭha ber zinga mi an ni a, hun tawp dawn thlengin kan tibuai pha. Amaherawhchu an theihna sang tak avangin kan dang tluan thei lo. Inzirna tur tam tak kan neiin ka hria," tiin theihtawp an chhuah thu a sawi.