Zaninah IPL eliminator khel dawn

Indian Premier League hmawr bawk a hnai zel a, zanin dar 7:30 hian eliminator round-ah Delhi Capitals leh Sunrisers Hyderabad ten qualifier 1 khel tur an zawng dawn. 

DC hi an vanduai takzet - a chung pahniha awm Mumbai Indians leh Chennai Super Kings nen an point hmuh zat in ang mah se net run rate-a an ṭhat loh zawk avangin eliminator hi an khelh a ngaih phah! Mahse, DC ṭantute tana thu lawmawm tak chu 2012 hnua a vawi khat nan a sang pali zinga an tel ve leh ta hi  a ni - final phei chu an la thleng ngai lo hrim hrim. 

DC hmachhawn tur Sunrisers Hyderabad hian palina nichungin league round an khar a, table-ah chuan point ruk ngawtin Delhi club hi an phak lo. Delhi tan eliminator paltlang tur chuan run 486 zet siam tawh Shikhar Dhawan chet ṭhat a ṭul ang a, amah thlawp turin kum 24 mi lek captain Shreyas Iyer chet ṭhat a ṭul bawk. 

DC hian an bowler chhuanvawr Kagiso Rabada chu hliam vangin an chhawr theih a rinawm lo a, South African fast bowler hian match 12 lekah wicket 25 a la tawh - SRH batsman-te an thaw huai ang! Sunrisers hi an ṭhat dan berin an inlan dawn bik lo. Tun IPL-a run 692 siama run siam hnem ber ni mek David Warner chuan Australia tana World Cup khel turin an ram team a zawm tawh a, Jonny Bairstow (445) pawhin England squad a zawm san. 

Hyderabad club tan batting lamah chuan innghah nan Manish Pandey hman a ṭul dawn tihna a ni. Bowling lamah wicket 17 laltu Khaleel Ahmed leh Rashid Khan (15) chu innghahna tur an ni ang.