Europa League Semifinal Tlang turin Arsenal dinhmun a ṭha
Arsenal tan Europa League final lut turin goal venhim ṭhat a tawk tawh a, goal khat aia tam an chhuah loh chuan an tlang dawn. Gunners hian zanin dar 12:30-ah Valencia an tlawh dawn - Spanish club hi semifinal first leg-ah khan 3-1 in an hneh.
Premier League aṭanga Champions League khel turin Arsenal an tling zo lo tih a chiang tawh, season thara European club inelna sang ber an khelh theihna kawng awmchhun chu Europa League nomawi chawi hi a ni.
50-50
Emirates Stadium-a an inkhelh ṭumin Arsenal hian hnehna chang tawh mah se Unai Emery a la ṭawng fimkhur hle a, second leg an khelhna tur hi Mestalla Stadium a nih avangin Spanish manager chuan, "Kan dinhmun hi 50-50 a la ni," tiin dinhmun ṭha zawk an la awm bik loh thu a sawi.
Arsenal ang bawkin Valencia hi La Liga lamah chuan pangana ni lai an ni, anni pawh hian UCL ticket nei turin Europa League champion nih an mamawh - mahni league lama beisei phak lo pahnih hian tlang zawk nih ngei an duh dawn.
Valencia hian an league match hnuhnung berah Huesca chu khualmualah 6-2 ngawtin an sawp thei, Marcelino Garcia Toral naute hian an khelh fuh ṭum chuan goal khung an thiam tih a chiang - tlarhnung pherh ve tak Gunners fans tan tui taka mut ngawt theih a ni rih lo.
Chak a ngai
Brighton and Hove Albion nen an inhnehtawk vangin Arsenal tan EPL-ah palina a nih theih tawh loh tluk a ni, an chunga awm Tottenham point hmuh zat la hmu thei mah se an goal difference chu goal riat ngawta inthlau a nih avangin an vanneihnain a tlin a beiseiawm loh.
League lama an beiseina a thamral rual chiaha Gunners inhnemna chu Europa League hi a ni. North London club manager chuan, "League kan ngaipawimawh bera, tunah erawh chuan Europa League kan ngaihtuah ber tawh ang," tiin Sevilla a enkawl laia vawi thum a champion tawhna hmuna hlawhtlin theih a inbeisei.
English club hian anmahni ṭawiawm tur fans 2,500 bawr an nei thei dawn. Mipui 55,000 vel lenna Mestalla Stadium-ah Valencia lamin fans thlawpna an hmu ṭha bik dawn tih a chiang a, boruak sangah Arsenal player an hriam tawk em tih fiah a ni ang.