Champion Hunthar an danglam

Suzuki Gixxer Pro Volleyball League 2019 khelh laiah Hunthar chuan an chunga awm Anastasia Electric Veng chu 18-16, 20-18, 15-9, 11-15, 15-9 (4-1) in an hneh a, table-ah Anastasia hi tlanpel nghalin pathumna dinhmun an luah nghal bawk.

Thawhlehni zan Chawn­pui Sports Centre-a inkhelah Hunthar chhuan­vawr Deepesh Kumar Sinha-a'n point 36 ngawt a hlawh chhuak a, cham­pion lai chakna thapui Dee­pesh-a hi RS Traders Player of the Night atan thlan a ni.

Set hmasa pahnihah Hun­thar leh Anastasia an inkhel tawk a, set la tur zawk pawh deuce hnuah a chiang chauh. Set hnuhnung pathumah erawh a tlang tur zawk chu fal taka an kal theih avangin a tir lama inkhel boruak sang ang kha a awm chhunzawm lem lo.

Match nga an khelh aṭangin Hunthar hian point 14 an nei a, an chungah hian Durtlang North leh Chhinga Veng Spikers te an awm - league match khelh hmabak an la neihah May 10 zan hian Tuichangral nen an inhmachhawn leh ang.

Anastasia hi palinaah tla hniam mah se semifinal an beiseina a la thamral bik lo. Ningani zanah table mawngphah luahtu Thuthak Nunpuitu Team nen an la inhmachhawn leh dawn, a sang pali zinga tel tur chuan set hloh hnem loa hnehna chan a pawimawh dawn.

PVL-ah hian match tinah set nga an khel zel a, an set lak zat zel hi an point neih a nih avangin match tin a pawimawh em em vek - league match an khelh zawh hian a sang paliin semifinal an khel dawn a ni.