Aw beiseina, i hming chu football maw lo ni a! Ropuia Barca ngamtu Liverpool-in final an lut

Anfield-ah Liverpool player, fans leh coaching staff-te hlim takin an zai rual dual dual a, an hmela hlimna lo lang chhuak leh lawm avanga mittui luang te chu thua sawifiah chi an ni lo. 

Nou Camp-a 3-0 a nghaisak tawh hnu, an hmanraw neih ṭhat ber zinga mi pahnih chhawr thei lo zui team khan beisei bo tawh hnu chu a tak an chantir a, khawvelin chu thil thleng chu mak tiin a thlir a ni. Nilaini zan khan Liverpool chuan Champions League final lut turin Barcelona chu 4-0 in an sawp a, inkhel hmasa nen belhkhawma an chakna chu 4-3 a ni - season zawnin final an lut ta. 

Liverpool boss Jurgen Klopp chuan, "Engtinnge kha thil kha an thlentir theih ka hre lo a ni," tiin a naute a fak a, hei hian Liverpool result ropuizia a hrilhfiah ber mai awm e. 

Liverpool-in inkhelh hmain an thiampuipa Mohamed Salah leh Roberto Firmino chu hliam vangin an chhawr thei dawn lo tih a chiang a, an tel chung pawha beiseina a tlem tawh ngaihtuahin 'beisei bo' tih chu an dinhmun hrilhfiahna awlsam ber a ni. 

Mahse, Liverpool player-ten ngaihdan dang an nei a, Barcelona lehthal turin an ṭha tawk tih an hai lo. Firmino inhliam zara bul ṭan Divock Origi chuan beiseina bul a ṭan a, minute sarihnaah goal hmahruai a khung. Barca-in goal thum an nei sa miau a, Belgian striker-in hma takah goal khung mah se 3-1 a la ni cheu a, Catalan club tan hlauhthawnna tur a awm lo - Reds keeper Alisson chuan hna a nei zeuh zeuh bawk. 

Barcelona media team chuan, "Goal khat lek kan khung pawhin goal nga an khung a ngai dawn. Goal khat tal chu kan khung ngei ang chu," tiin social media lamah an tarlang zui a, an hlauthawng lo. 

Barca media team-in hriat loh pakhat an nei a, chu chu Anfield boruak ropuina a ni. Dutch legend Johan Cruyff khan, "Khawvelah Liverpool leh fan-te inpawhna ang nei club an awm lo. Kop ho kha ka thlir reng a, ka thisen zungzam zawng zawng hi an fan chhuak vek ni mai hian ka hria," tiin a lo sawi tawh a, Barca player-ten Nilaini zanah an tem ve ta. 

Andy Robertson inhliam avanga bench aṭanga luhtir Georginio Wijnaldum chuan second 122 chhung lekin an mamawh goal hnih a rawn khung a, Anfield thawm ring tak chu sawifiah theih a ni lo a, a taka tem chi a ni. Liverpool-in an la duhtawk mai lo. Trent Alexander-Arnold corner fing tak aṭanga ball kal chu Origi chuan chakna goal ni turin a pet lut a, a tlem bera goal khat khung inbeisei Barca-in goal khat chauh pawh an khung lo. 

Anfield mipui thawm bengchheng karah Lionel Messi a thamral a, "Anfield-ah ka goal khung ka lawm lo ang," titu Luis Suarez tan duh tehreng pawh ni se goal khung lawm tur a awm lo a, a ropui ṭhinna hmunah Philippe Coutinho chu chawlh hahdamna zawnga hmu zo lo ang mai a ni.