Mangṭha mai le treble...

Anfield-ah mualpho takin an tlawm a, Barcelona-in treble no-mawi chawi an beiseina a tawp zui. Season ṭantira, "La Liga leh Copa del Rey nomawi chawi mah ila lawm a kim lo a, Champions League hi kan hawn a hun leh tawh a ni," titu Lionel Messi thusawi pawh engmah lo mai a ni leh ta - tun hi 2013 hnua Champions League final-a Messi emaw Cristiano Ronaldo inlan lohna hmasa ber tur a ni. 

Barcelona boss Ernesto Valverde chuan, "Eng tiang takin nge min nghawng dawn ka hre lo a, mahse coach ka nihna ang chuan ka mawhphurhna a ni. Kan tan chuan a na em em a, a bik takin kan fan-te ka tawrhpui a ni. Season zawnin 'comeback' an tuar a ni," a ti a, Barca-a enkawl chhunzawm zel dawn leh dawn loh a hre lo.

Catalan club hian season hmasa khan quarterfinal-ah Roma chu Nou Camp-ah 4-1 in hneh mah se second leg-ah Italian club hian 3-0 in an lehthal - hetihlaia Roma keeper hi tuna Reds keeper Alisson tho a ni. Barcelona midfielder Sergio Busquets chuan, "Rome-a thil thleng duhawm lo tak hnuah a thleng leh ta. Fan-te hnenah ngaihdam ka dil a ni," tiin a sawi.